今個星期五會有兩幅地皮截標，分別係荃灣楊屋道商業及住宅綜合發展地皮，同埋馬鞍山恒光街限量地。其中楊屋道地皮總樓面超過100萬方呎，劉Sir知道，地皮上蓋商業部分可以做寫字樓或者酒店，有測量師老友覺得項目「玩法多」，所以競投氣氛唔會受到市區重建局觀塘市中心項目流標影響，呢兩幅地皮估值加埋大約65億元。

荃灣楊屋道商業及住宅綜合發展地皮，市場估值最高約61億元。（資料圖片）

張聖典認為，荃灣楊屋道地皮可看高一線。（資料圖片）

兩幅截標地皮資料

老友理想城市張聖典同劉Sir講，呢幅荃灣楊屋道地皮可以睇高一線，地皮同上個星期流標嘅觀塘重建項目唔同，其商業部分「玩法多」，起寫字樓或者酒店都得，具有一定吸引力，相信部分發展商或會與專門發展酒店嘅財團合作。

綜合發展建790伙住宅

張聖典估計，周五截標嘅楊屋道地皮競投氣氛預料唔會太差，預計項目每方呎樓面地價約5,700元。折合估值大約61億元，係市場估值上限價。

其實近年荃灣區已經有唔少發展項目批出，劉Sir相信喺區內有項目嘅發展商會有較大投標意欲。韋堅信測量師行林晉超都認同，佢話即將截標嘅楊屋道綜合發展用地，唔同發展概念對項目地價會有唔同睇法，不過區內有項目嘅發展商，競投上會有一定優勢。

劉Sir知道，呢個楊屋道商業及住宅綜合發展地皮，佔地大約15.24萬方呎，劃分為A及B兩個地盤。其中A地盤做商業用途，可建樓面約64.32萬方呎；而作住宅發展嘅B地盤，樓面就大約42.37萬方呎，項目須提供唔少過790個單位。

馬鞍山地最多值4億

至於同日截標嘅馬鞍山恒光街限量地，規模就細得多，地盤面積約3.3萬方呎，總樓面約11.5萬方呎，限建最少180個住宅單位。

之前批出嘅同區馬錦街限量地都有唔少財團入標競投，劉Sir估計呢幅恒光街地皮都可以吸引唔少中小型發展商入標，包括早前以7億多元奪得馬錦街限量地嘅宏安（01222）。

市場預期恒光街限量地樓面呎價約3,300至3,500元，計番估值即係大約3.8至4億元。