魚缸Blogger：京信通信漸入佳境

六月話過京信通信（02342）股價仲有得上，因為去年績差因素已經反映得七七八八，當時高盛亦都估佢今年中期虧損縮至5,200萬元。點知近日公司宣布成功提前扭虧為盈，令人喜出望外，尋日升逾半成，收報2.52元，14日RSI處60，呢轉衝完七月高位2.65元後，下站阻力上移到2.8元。

京信喺周三發盈喜，預期截至今年六月底止六個月將會錄得純利5,000萬元或以上，去年同期則蝕1.5億元，原因係全球經濟逐漸復甦、內地推動4G網絡建設、公司推出高端產品、規模效益及成本控制措施奏效，令到收入增長不少於30%、毛利率改善不少於兩個百分點、經營開支佔收入比下降不少於3個百分點。

隨住4G正式商用，京信相關業務訂單增長自然唔錯，海外市場亦見動力，早前更透露過今年巴西世界盃12個場館中有8個由佢負責無線解決方案，並料一六年巴西奧運會可再參與，未來收入值得憧憬。