美國公布第一季GDP經歷2.1%收縮後，第二季拗腰反彈，升4%，創去年第三季以來最大升幅，較華爾街估計的3%理想，數據刺激美匯指數創十個月新高。隔晚聯儲局議息無乜新意，一如預期減少每月買債規模100億美元，使每月買入MBS及長債金額縮減至250億美元，估計兩次會議後，整個QE的歷史任務就會完成。

市場競爭減少，電訊商亦紛紛加價，和電業績可望重返正軌。（資料圖片）

太陽日誌

綜合大行對和電香港之預測（港元）

不過，聯儲局主席耶倫仲係唔想就幾時開始加息講得太白，實行等大家自己估幾時發生。今晚華爾街焦點係七月就業數據，市場估失業率會維持6.1%，非農職位增加23.1萬個，如果達標，會係連續六個月交到20萬個新增非農職位，市場公認支持經濟復甦的基本要求，斷估聯儲局加息壓力會更大。

但筆者反而擔心，周初美國公布的五月二十大美國城市房屋價格跌0.31%，是兩年來首次，債息帶住按揭息觸底回升，股市唔多覺，但美樓市已經有負面反應，估計美息即使要加，幅度都會好有限。

大市先調整更健康

過埋期指結算，好友仲係未想停一停，抖一抖，昨日恒指再升24點收報24,756點，主板成交稍減，由前日過千億回到840億元，整個七月埋單計數，恒指累積升1,566點。

指數升成咁，昨日大市升跌股份比例仲係停留51對49拉鋸局面，證明資金捧落後重磅股，暫時唔理其他增長股、二三線股、國策股的大環境未變。港股上次八連升已經講緊一二年十月，嚴格上，當時是十連升，恒指升了910點，相比今次八日進帳1,369點，已經肯定勁過當日。

依家距離後海嘯，一○年的24,988點只係一步之遙，承如在下之前預期，升穿應係遲早問題，若今年恒指低位確認21,137點，以過去兩年大市高低波幅都有四千六百多點，今浪指數見25,800點附近，可算是合理推斷，反而近日咁升法，如果可先來個調整，或者後市會更健康。

買股票，好消息唔升，同壞消息唔跌之中二揀一，當然要睇實後面一類，和電香港（00215）中期成績表其實差到無朋友，純利跌44%至3.23億元，綜合EBITDA都跌20%去到11.81億元，ARPU亦都按年倒退5.3%至197元。

行業日後競爭減少

昨日睇番，差過晒大部分外資行預期，公司歸咎智能流動通訊市場價格競爭激烈，期內服務收入倒退11.3%至23.48億元，流動硬件銷售20.9億元，按年有15.2%升幅，但同去年下半年比較卻跌13.2%。

和電昨日股價開3.15元，最低隊落3.03元，把整個七月升幅抵銷，最後拗腰升0.05元收3.33元，一來市場對預期九月底面世的iPhone 6寄予厚望，其次係PCCW併購CSL後，競爭少咗，近期電訊商陸續以網絡成本高漲為由，紛紛加價，和電被視為壞消息出盡，業績可以在未來兩年回到正軌。

但少隻香爐少隻鬼故事，推動股價由五月初低位2.52元，至今已累積32%升幅，一五年PE 16.9倍，息率4.38厘，合理但未算好平。睇埋對手數碼通（00315）一五年估值相若，PE 16.6倍息率4厘，經過近兩個月升浪，似乎捧場客可以等一等，如果見熱錢轉向流入增長及三四線股，這類被視為防守的股份，或者先有執死雞機會。