正當大市上升動力減弱之際，部分落後股繼續發力向上，鞍鋼（00347）昨日終於突破七月兩次挑戰不果的5.7元水平阻力，最終收報5.79元，升5.2%，加上成交有1.57億元，既然係威係勢，不妨望多兩眼。

鞍鋼近期升得頭頭是道，確有其因由。鋼鐵業屬於產能過剩行業，作為業內龍頭的鞍鋼，理應受惠業內汰弱留強；其次，近期市場熱炒鬆綁部分地區樓房限購令，使內房股發力向上，而這亦有機會帶動原材料需求上升，間接利好鋼鐵股氣氛。

走勢上，昨日大市整固之時，同類股如馬鋼（00323）及重鋼（01053）分別持平及跌1.7%，鞍鋼則破位而上，走勢明顯強於同類股份。最後睇盤路，近二十個交易日瑞信主動買盤達1,837次，較主動沽盤的1,069次多，而大摩主動買盤亦達1,346次，料在主動買盤帶動下，鞍鋼股價可更上一層樓，短期若能上破6元，下站睇6.7元。