流標漩渦由發展地皮蔓延到天價豪宅新盤市場，新地（00016）山頂洋房新盤TWELVE PEAKS同埋新世界（00017）尖沙咀名鑄，原本分別招標推售2及5伙，尋日突然雙雙宣布流標收場。前者更已表明會喺下個星期捲土重來，但為咗令買家更清楚掌握到物業價錢，將會改用傳統推出價單方式發售。

新地雷霆指出，下星期會公布TWELVE PEAKS價單同銷售安排，希望買家能夠更加清楚掌握物業價錢。（資料圖片）

新地副董事總經理雷霆

兩大流標豪宅新盤

近排天價豪宅新盤蜂擁出擊，TWELVE PEAKS首推11同12號屋，日前經已截咗標，發展商講明最遲尋日通知中標結果。正當劉Sir熱切期待發展商公布成交價等詳情之際，突然接獲流標消息。

雷霆：唔再用招標形式

新地副董事總經理雷霆話，招標過程中，客人對物業地點、環境同質素反應正面，但就無標書反映到物業真正價值。

雷霆話會喺下個星期公布新銷售安排，為咗令買家更清楚掌握物業價錢，將唔再用招標形式發售，改為發出價單同銷售安排賣樓。

話口未完，劉Sir又收到新世界傳嚟流標消息，佢哋旗下以招標形式重售嘅尖沙咀名鑄，首推5個特色單位尋日截標。

發展商透露，招標期間市場對呢個盤位置、單位景觀同質素反應正面，但收到嘅標書未能反映物業真正價值，所以發展商決定唔接納任何標書，下一步銷售安排有待公布。

新世界南里加推十伙

至於同樣正招緊標嘅山頂司徒拔道傲璇，太古集團接獲地政總署通知，6樓單位最新地租近12.6萬元，10樓逾13萬元，而複式B室則約14.4萬元，上述3伙地租之前均為70,560元。

另外，同屬新世界的西環南里新盤EIGHT SOUTH LANE，尋日再賣出11樓C單位，實用面積304方呎，成交金額608.1萬元，項目累售33伙，套現逾兩億元。發展商尋日發出新銷售安排，加推共10伙B及C單位喺下周一賣，售價由708.3至756萬元，呎價由23,299至24,000元。

此外，長實地產投資董事劉啟文話，截至昨午，大埔嵐山第I期已賣咗436伙，星期六發售加推嘅246伙後，將會積極考慮調整售價或優惠，變相提升價錢。