港股六連升，終於去到三年○八個月高位。結算前夕，恒指昨再升211點收24,640點，主板成交886億元，是四月滬港通消息見光死之後最高紀錄。升市有充足成交配合之外，睇番八月期指撇去除息因素，輕微高水，相反七月做緊低水可見，反映轉倉的期指客似乎看好八月初港股表現。

近日升市有充足成交配合，反映基金

太陽日誌 2014/7/30

長實業績預測（港元）

自從六月中，港匯就貼實7.75的強方兌換保證水平橫行，熱錢泊住港紙，居然港股等到近個多星期先出現井噴式升市。陰謀論認為係大孖沙等埋七一「無事無幹」才郁手。筆者唔排除有咁可能，不過更大可能性是市傳的滬港通喺十月十三日開車，基金經理確認兩地互聯互通落實，先至急急在過去幾日「制」。

睇番過去幾日唔單止港股勁，滬綜指由2,050點炒到上昨日高位2,193點，六日升6.9%，連帶人民幣匯價上返6.18，是三月中以來最高，A股ETF安碩A50（02823），由五月最差時折讓0.31%，去到昨日反而有4.18%溢價，在在可見，今浪熱錢湧入中港兩地股市，相當之全面。

切忌認叻估頂做淡

值得留意，今浪升市資金主要熱捧一些過去兩年，股價走勢悶到發荒，估值又夠低殘的重磅股，如內銀、內險及內房股等，反之上半年一直跑贏大市的增長股，或政策支持的中資股份，慘變基金提款換貨對象，享受唔到升市不特止，唔少仲逆市向下。

綜合股份升跌比例由六連升之初，66對34，逐日回落去到昨日幾近五五比。經驗告知升市愈近尾聲，資金亂石投林往往造成升勢由一線股，變成二、三、四線股帶動，今次愈升，基金一直維持高度集中在重磅股身上，除咗今鋪升市未有耐玩完外，真係諗唔到其他更合理解釋。睇嚟就算超買的港股在結算前抖一抖，看官都唔好隨便估頂做淡。

過去年多，大行清一色睇淡香港樓市，理由係政府辣招，配合美國加息預期，認為港樓難逃一跌。不過，早前特區政府修訂DSD細節，被視作辣度見頂，近排中細價樓升浪再現，大行都轉晒口風。從中證實兩點：一是資本主義社會上，政府干預愈多，市場愈畸形；二是分析員唔係先知，尤其對大環境好似股市指數、樓價走向等預測，同普羅大眾一樣，往往是錯得離譜。

新世界屬最平選擇

套用男神黃子華金句：「搵食啫！」今日唔少外資行的地產股分析員都僅僅三十出頭，九七樓災時仲讀緊書，選擇信佢，其實自己都有責任。反而掌握香港金融命脈的財爺曾俊華，金管局第一把交椅陳德霖，近幾年幾次公開講話都指樓市位高勢危，勸市民入市要量力而為，萬一信到佢十足十，幾年前有能力但延後置業，今日恐怕恨錯難返。

在下不止一次提過，香港樓價處歷史高位，相對本地地產股，大都同○七年高位有段距離，若非樓市錯價，地產股終會追落後，昨日本地幾隻主要地產股全部創今年新高，但依然遠低於重估後每股價值，隨着睇淡樓市聲音愈來愈細，地產股追落後相信可維持一段時間。

最平選擇，當然係今年供股供到古靈精怪，股價大落後的新世界（00017）。正路之選則可留意明日出中期業績的長實（00001），近期荃灣及大埔兩個新盤環宇海灣及嵐山，一個低於同區二手樓價，一個177呎迷你單位，市場有noise亦去得快，今年賣樓收入有保證，只嫌過去幾日真係升得急少少，如果落番140元邊，可以諗吓。