本周四期指結算，好友似乎唔打算放生淡友，上周五美股受企業業績麻麻拖累偏軟。可是，大市未扭轉大成交額配合，不斷挑戰阻力的氣勢，恒指昨日升212點，收報24,428點，主板成交有854億元。

恆指期貨走勢2014/7/28

七月期指日市收報24,388點，較合理值低水40點，成交11.2萬張，轉倉進入高潮，八月期指上周五未平倉數目升至5.19萬張，連同七月9.23萬張，兩月合計未平倉總數升至14.42萬張。

睇番本月恒指低位23,126點，高位是昨日的24,501點，本月指數高低波幅暫時有1,375點，已係六月悶市595點的231%。

臨近七月期指結算，相信好友會傾向盡量推高結算價，實行一個月搵埋兩個月數，睇番六月之外，四月是本年最低波幅月份，恒指有1,127點，最高是二月的1,788點，按趨勢，不能太早下定論今個月是否會改寫紀錄，直逼25,000點關。

在23,400點開的好倉，以為要捱時間，點知滬港通消息令大市變速提早出現，咬住唔放策略，暫時唔會因此改變，短期目標仍係21,137至24,111點的1.236，即24,813點。