匯市波幅終於慢慢回升，最開心的莫過於炒即市炒家，而對於筆者呢啲睇中線的亦都開心，因為美元開始全面走強，上周美匯指數收於81關口。

紐元兌美元走勢

讀者應該有印象我數月前多次提及美匯自去年十月一直只於79至81.30橫行整固，一旦突破將行出一段單邊市況，依家美匯又重臨關鍵阻力，投資者自然要金睛火眼望住啦。

好多讀者過去半年問我買咩外幣，我都係話買英鎊同紐元，但由於我係美元好友，所以話如果唔係諗住收息而係諗住升值，不如揸美元同港元就算。

要明白一點，匯市同股市唔同，匯市係相對的，上星期連最強的英鎊同紐元都腳軟，更突顯美元強勢已儲夠氣，有條件行番個似樣單邊市。

紐元毋須急於買入

紐元就唔駛多講，短線息口將要停一停，市場已開始預期新西蘭今年內再加息機會減低，紐元自然亦要調整，不過，中線睇紐元始終有高息優勢，而且央行只係暫時停一停，年初已講埋未來兩年將息口升至合理水平的4.75厘，因此食息一族仍可候低吸納，只係莫買當頭跌，可以稍等調整完成才重新吸納，0.85係第一個支持位，理想價位可以留意0.8300至0.8360。

今個星期有三個焦點，首先係美國第二季度GDP、然後有聯儲局議息會，最後仲有七月非農業新增職位，全部都係圍繞美國經濟，美元自然成為市場主角。