傳滬港通十月十三日開通，堅定流？大家都係得個估字，筆者亦無乜小道消息，但近期八到外資投行四圍招兵買馬，搵專責處理A股的賓架，希望差咗幾年的生意，可趁年底的滬港通帶來一點起色。

半導體產品周期短兼不斷降價，中芯前景難望樂觀。（資料圖片）

太陽日誌2014/7/29

綜合大行對中芯業績預測（美元）

港股升都有些少自動波迹象，選擇性唔跟上周五，因上市公司業績差，高位調整的美股，反而揀昨日急升超過2%的祖國股市去跟。昨日恒指開高33點後，好快已經改寫今浪高位，推到上24,501點，收市升212點收報24,428點。大市連升五日，且未見消歇性升市迹象，主板成交854億元，是今轉升浪第二高，僅次於上周四的860億元。

藍籌中不得不提兩隻新高股，港交所（00388）見過169.6元，超過三年新高，收169元升3.4%。一句講晒，基金經理相信升市又無特別心水下的必選股；阿里巴巴可能趕唔到八月上市，騰訊（00700）捧場客似乎更加高興，皆因音樂椅遊戲仲可以玩多一頭半個月，騰訊見過129.4元歷史新高，等於拆細前647元！

入市時機最為重要

唔講唔知，話咁快踏入八月，一四年至今恒指其實累積升幅得4.8%或1,122點，有92.7%即係1,041點，喺過去五個交易日所產生。筆者提出嚟，係想話入市唔在於勤力磨爛席，timing勝過一切。睇番轉頭，經歷六月份唔尋常的低波幅，在在可見基金積累的購買力一直按而不發，從近幾日現貨成交持續高企，期指轉倉也較前活躍，似乎今次強勢延續落去八月的機會相當之大，看官們要好好把握機會，好天收埋落雨柴。

基金股中，達芙妮（00210）昨日破位升7.5%，收報3.43元，第二季同店銷售麻麻，跌2.4%。半杯水可以睇成半滿，瑞銀報告話搵咗《星星》女主角全智賢代言後，同店銷售由第一季跌9.5%，第二季已有所改善，目標價睇4元嗌買。

盈喜股，雲頂香港（00678）預告中期溢利淨額超過1.8億美元，比去年同期2,300萬美元大升6.8倍，主要來自三月出售Norwegian Cruise Line提供1.53億美元一次性收入，以及金融資產重估獲利1,500萬美元，加埋兩條數，條實數其實差過舊年，不過股市有理無理炒咗先，乾升16.3%收3.49元。

產品技術不斷更新

內地晶片一哥中芯國際（00981），調高第二季毛利率指引由原先22至24%，上調至27至29%。對半導體產業，在下真係舉手投晒降，資本投入大，產品技術不斷更新兼且不斷降價，生產商長期同單位折舊成本競賽。好似最近中芯主打28納米晶片，世界一哥台積電已經做緊20納米，甚至開始14納米接單，行業根本係winner get it all的遊戲。龍頭之後幾個玩家，賺唔賺到錢睇行業景氣，排後面的，基本係長期吊鹽水甚至蝕住做。

上星期，○四年坐到依家的基礎股東北大青鳥（08095），在本月十七至二十五日期間，沽咗近6,000萬股中芯，持股量由0.583%降至0.411%。中芯股價在六毫子邊悶咗好耐，六月底炒上，嗰幾日股價介乎0.71至0.79元，其實無乜見過鑊氣，但反映舊股東一樣坐到唔耐煩，亦明白周期股有波幅無升幅，唔再等運到的事實。