港股勢如破竹,內地消息指滬港通將於十月十三日開通,港交所(00388)成頭號追捧對象,高位搶到去169.6元,中資券商股亦升到開巷,海通證券(06837)、中信証券(06030)及中國銀河證券(06881)升幅介乎3至8%,而中資背景本地券商股升勢更凌厲,第一上海(00227)及申銀萬國(00218)分別升20%及17%。

滬港通料將帶動兩地金融市場資金流,內銀股具追落後條件。(資料圖片)

朝住呢個方向,其實隻信達國際(00111)都有得諗,上周已開始見異動,尋日升6.5%,成交尚不多,可視為小注冷敲對象。

滬港通帶來突破點

A股成功擺脫弱勢,尋日滬綜指收報2,177點,升51點,深滬兩市主板總成交超過3,300億人仔,真係唔簡單!事實上,現時兩地股市,某個角度睇同香港樓市現象有點類似。香港樓市因為政府行政措施打壓下,用家這些年一直在場外觀望而唔敢入市,直至今年,利息繼續低迷,新盤開售價「相宜」,用家便按捺不住入市,樓價回升。

再睇魚缸,近年市況淡靜低迷,唔少人一直在觀望,結果滬港通終於帶來突破點,大家見指數突破長期阻力位,且成交大增,都爭住落場買貨,股市遂升。阿莊相信,呢期投資者入場追樓追股可成氣候,資產價格重現活力,對刺激消費,對帶動經濟增長可謂事半功倍。既然大方向已清晰,缸邊友亦不用再猶豫,抖擻精神,及時檢討投資組合,上足子彈,年尾食粥食飯都係靠呢個大浪!

基於睇好內地股市轉勢以及滬港通帶動兩地金融市場資金流動,中資金融股現價仍相對落後。好耐唔見有大新聞的交通銀行(03328),尋日傳來已就混合所有制試點遞交申請的消息,刺激股價升6%,收報5.81元。即使論估值,交行市帳率才0.8倍,在板塊氣氛轉好下,發力追落後亦唔使太多理由。

除內銀股外,內險股亦值得留意。平保(02318)旗下壽險及產險首六個月保費收入均錄得逾兩成增長,早前旗下平安銀行發行新股及優先股,平保亦參與認購,變相加大銀行業務的投資。

以尋日收市價65.15元計,平保預測市盈率約13倍。若然A股真係重拾升軌,以其業務性質及權重比例,有條件成為首批大翻身的龍頭股。中線目標可定在80元,重要支持在58至60元區域。