魚缸Blogger：高鑫零售可追落後

近年高鑫零售（06808）致力提升營運效率、開拓新購物渠道，以增強行業競爭力，股價經過上半年嘅大跌浪後，近日開始有番些少起色，上周五微升0.3%至9.17元，不妨吼實博反彈機會。

高鑫在內地經營大賣場「歐尚」同「大潤發」，去年共有323家，主打銷售食品、雜貨、家居用品、紡織品及日用品，另「飛牛網」於今年一月亦都正式開放。今年首季營業額增長9.3%至277.5億元人仔，純利增長10.9%至11.7億元人仔，已佔去年全年所賺27.7億元人仔的42.2%。

唔少大行睇得幾淡，大致都係話佢受累內地食品零售下行、網站可能錄得虧損、開設新店數目減少，租金收入增長放緩等，紛紛下調目標價同叫人沽。不過，過去一年公司股價唔見咗三成五，睇怕負面因素已經反映一大截，而且近日由一年低位8.5元反彈，成功收復50日線9.12元，啱啱出現黃金交叉，炒落後睇住10蚊先。