魚缸Blogger：萬科企業候回調收集

內房龍頭萬科在本港擁有兩家上市公司，分別是六月才由B轉H嘅萬科企業（02202）、以及前年入主嘅萬科置業海外（01036），尋日股價分別上升1.5%及3.4%，收17.38元及8.9元，前者啱啱破頂，後者則追落後，兩股各具吸引力。

萬科企業去年多賺兩成至151.1億元人仔，主攻內地及海外項目；而萬科置業則少賺七成至1.5億元，專注香港樓市。查實萬科在新加坡、舊金山同紐約都有業務，往後會唔會全部放晒入萬科置業不得而知，但萬科置業與新世界發展（00017）各佔20%及80%權益的荃灣西鐵項目（TW6項目），日前就剛訂立融資協議，而前者股價近幾個月三度觸及低位8.1、8.08及8元都唔太跌得落。

至於內地樓市，有指內地限購鬆綁城市增至30個，帶旺內房股受到資金追捧，萬科企業近日股價沿住10日線15.88元上升，技術上已進入超買區，畏高的話，可等到回調至16蚊邊收集較值博。