馬航客機被擊落事件，對全球金融市場帶來的震盪意外地短暫，道指經過上周四急跌後，周末前已重上萬七點關口，收報17,100點，升123點。Google季績比預期理想，成為股市上升的催化劑，VIX恐慌指數大幅回落。上周五恒指亦只係輕微回落66點，期指夜市已拗腰回升66點，反映今早港股好大機會收復失地，彈番上23,500點樓上再玩過。

東航因人民幣貶值而需要發盈警，但早在市場預計之內。（資料圖片）

太陽日誌2014/7/21

東航往績表現（人民幣）

失蹤的MH370都仲未搵番，如今又有MH17遇襲，本身早就負債累累的馬航，一年之內經歷兩次航空史上的重大慘劇，如今日日「吉」機燒150萬美金，睇怕再咁落去，三至六個月內馬航手頭資金將會耗盡，如果持有七成股權的馬來西亞政府投資基金唔揼水，估計最終得倒閉一個結局。

上星期五收市之後，東航（00670）出盈警，預告上半年盈利會降至5,000萬人仔內，相比去年同期的7.63億元人仔，真係連零頭都無。同南航（01055）一樣，因今年初人民幣貶值，令東航手上外債錄得匯兌損失，股價由去年底高位3.29元至今累跌逾兩成，預期市帳率0.91倍，貼近十年低位。

匯兌損失可望減少

注意到，上周初南航盈警後，東航股價反而級級上，一來市場預咗上半年盈警，壞消息出盡；其次人民幣貶值步伐近日停咗落嚟，下半年外債匯兌損失應該收斂，有得博吓。飽受疫症、恐襲及環球經濟乍暖還寒的折磨，近年不論成熟市場還是發展中國家，航空事業都唔易做，依家魚缸入面，又有咁多低殘的中資周期股，要唔要揀航空股嚟博，先至係最難決定。

被SCA（愛生雅）收購後，維達國際（03331）終於有着落，以11.44億元現金收購SCA在中國、香港及澳門的商業營運業務，包括可免專利權費的基礎下，取得港人熟悉的「Tempo 得寶」品牌在中國、香港及澳門之的永續及獨家使用權。另外，交易包括「Dr.P 包大人」及「Sealer 噓噓樂」的擁有權，以及「TORK 多康」、「TENA 添寧」、「Libresse 輕曲線」及「Libero 麗貝樂」的中、港及澳獨家使用權。受消息刺激，上周五股價升3.4%，報11.98元。

維達要有長線準備

單睇收購的愛生雅生活，去年賺得2,314萬元，交易唔算得上好平，不過平心而論，好難純粹以PE計交易抵唔抵，事實SCA去年斥資88億元收購維達，就係因為本身在內地發展麻麻，想借助維達的銷售渠道，在大中華拓展旗下品牌，希望一加一大於二。最後如意算盤打唔打得響，仲要睇入主後，管理班子執行力夠唔夠。今日買維達，無疑係信SCA在11元入貨番嚟，唔會畀佢衰得去邊。

睇番上半年維達成績，純利2.22億元，按年少賺21.8%。由於公司大部分交易以人民幣計值及結算，借貸則集中港元及美元，單是人民幣貶值，已經使外幣匯兌虧損3,340萬元，相對去年同期則有匯兌收益3,140萬元，一來一回成為業績倒退的主因，但大致在市場預期以內。上半年短纖價格回落，提高採購比例，應有助紓緩下半年成本壓力，下半年業績斷估可以好番些少，預期市盈率22倍，捧場客可能要有較長線持貨等成績浮現的心理準備。