今年馬航「禍不單行」，上周全球股市亦因此震盪，恒指周五低開兩百點，但尾市跌幅收窄至66點，收報23,454點，航空股未見太大波動。經突發消息測試大市沽壓後，似乎市場上好友仍比淡友多，唔少人都在等跌市買貨。若然呢個判斷冇錯，港股市底仍然偏強，後市不宜過分看淡。

粵海置地作為廣東省政府在港上市的房地產公司，極具注資憧憬。（資料圖片）

上周五傳來阿里巴巴擬延至九月才在美國上市，即係話距離「滬港通」啟動的時間不足一個月，到底大戶如何部署，未來一個月或現端倪。本月以來，撇除有政策消息的因素，明顯有資金在吸納三大中資電訊股。

知名品牌股有優勢

阿莊依然相信，要分享滬港通的升浪，可以從未在A股上市，但又廣受內地消費者認識的大品牌股落手，如早前本欄提及的旺旺（00151），另蒙牛（02319）、恒安（01044）、康師傅（00322）、聯想（00992）都係實力之選，可逢回吐收集。

舊年上市的雲遊控股（00484），招股價51元，認購率達313倍，風頭一時無兩。聽聞唔少投資老手買嚟坐，睇好佢可變「紅底股」，阿莊都有心動過。可惜，隻股最高只見過73.95元，之後反覆回落，上周五在盈警消息拖累下破底，低位見22.35元，收報22.4元，跌13%，若然IPO認購持有至今，經已唔見一半有多，真係一殼眼淚！咁到底隻股仲值幾錢，就要睇埋中績始可下判語。

上周阿莊提過，紅籌股係落後一族，可以冷敲。見到上周中旅（00308）、粵海投資（00270）、粵海置地（00124）等股價及成交均有異動，其中值得一提的是粵海置地，前周股價10日線升穿50日線，上周股價連升四個交易日，周五收報1.81元，升9%，已重上牛熊分界線，成交增至2,450萬元，是次金叉利好訊號頗為準確。

前稱「金威啤酒」的粵海置地，現時市值31億元，晒士唔大，市帳率僅0.7倍，截至去年底手持現金及等值31億元。上月底公司已發盈喜，預計中績虧轉盈，主要是去年下半年已出售虧損的啤酒業務。阿莊依然相信，在眾多內房股之中，此股絕對係穩陣之選，至少財務穩健是一大優點，現時估值未有反映旗下深圳羅湖布心項目的發展潛力，而作為粵省政府旗下在港從事房地產業務的上市公司，相信注資只係遲早的事，關鍵在於閣下有沒有耐性坐貨。