全城搶盤，連銀主盤都搶爆。單係五月到依家，市場就有約25個銀主盤賣出，相比今年頭四個月都只係得約21宗，去貨速度明顯加快。地產代理老友同劉Sir講，銀主盤由於內部保養通常唔及私人業主單位，所以好多時要平啲先有承接，但最近喺人人熱搶交吉盤情況下，就變得吃香，仲頻頻錄到貼市價成交，好似將軍澳夾屋叠翠軒有單位仲搶到新高價先賣出，都咪話唔誇張。

卓先潘子明表示，銀主盤勝在交吉。（資料圖片）

將軍澳夾屋叠翠軒有銀主單位搶至新高價成交。（資料圖片）

近期部分貼市價成交的銀主盤

自從舊年開始，市場就不斷有銀主盤放賣，普遍叫價都幾硬淨，有啲盤舊年放到依家都未賣出，所以一般平均每月只得幾個銀主盤成交。

成交量超過頭四月

劉Sir數數手指，五、六月份市場銀主盤成交就有雙位數字，分別有約13個同10個單位賣出，加埋今個月有兩宗同類成交，計落只係兩個幾月就有約25個單位賣出，超過今年頭四個月銀主盤賣出嘅總和，相信係市場缺盤令買家有盤就掃。

睇番成交，個別銀主盤更加被搶到創新高，好似將軍澳叠翠軒4座高層G室，銀主底價約550萬元，個單位放盤無幾耐，已經有幾組客聞盤而至，最後搞到要暗標先賣出，最後成交價搶至590萬元，破咗屋苑歷史新高，實用呎價近9,000元。

早排沙田蔚景園2座中低層C室有個銀主盤喺拍賣場推出，就吸引到4組客爭購，搶吓搶吓，最終搶高40萬元，由用家以390萬元市價買入，以實用面積379方呎計，實用呎價10,290元。

同樣透過拍賣推出嘅將軍澳中心3座高層F室，實用面積684方呎，吸引到3組買家競價，最後仲搶高咗90萬元，以678萬元賣出，實用呎價要9,912元，比個別銀行估值高咗少少。

用家見息低難忍手

卓先潘子明話，近期好多用家見低息環境持續，都急不及待入市，令私宅市場相當缺盤，而銀主盤就勝在係交吉盤，所以唔少買家都唔介意要畀錢執執個單位啲裝修。

好多時啲細價公、居屋銀主盤，個盤一收番嚟已經好快賣出，如果現時氣氛持續，相信細價銀主盤承接力仍會唔錯。