魚缸Blogger：暢捷通穩中有升

雖然魚缸表現奄悶，但新股照樣爭住上市，當中有唔少漏網正嘢，好似周二推介過嘅先達國際物流（06123）即為例子。而掛牌日子耐啲啲、較大價嘅暢捷通（01588），走勢亦見穩中有升，不妨關注吓。

暢捷通係一間小微企業軟件及服務供應商，近年旗下T+系列軟件產品銷售大增，公司剛獲人行授予非金融機構支付業務許可證，即係話可以在內地提供互聯網支付服務及銀行卡收單服務，有助提升盈利能力。望吓業績，一一至一三年分別錄得純利1.2億元、1.1億元及1.2億元，毛利率高逾90%。除依靠軟件分銷業務外，今年公司會推企業雲應用，明年將向第三方開發商開放雲平台，料可進一步增加收入來源，只不過起步頭幾年，要有心理準備拉低毛利率。

睇番幅圖，近日股價沿住10日線上升，昨即市高見16.8元的上市新高，以16.3元收市，升幅1.4%，無蟹貨隱憂，唔大貪先睇18蚊。