Fundman睇市：建滔積層板 有潛力

從樂觀角度睇，人行五月推定向降準，推動五、六月新增貨款超額完成，截至六月底止係5.74萬億人仔，比去年的5.08萬億人仔高出近一成三，加上出口保持單位數穩定增長，以及下半年中國鐵路及基建投資加快，成台戲，仲係要按住中央保全年GDP 7.5%的劇本進行。

有大行調查顯示，上月環球基金手頭的淨現金水平去到4.5%，是過去十三年有紀錄以來第二高，隨着中國經濟硬着陸機會降低，短期會吸引更多資金由成熟市場回流發展中市場，尤其係中國。近日市場預期，下半年中國會全面降準甚至減息，看來第三季成事的可能變得渺茫。

耶倫化身分析員

前晚，聯儲局主席耶倫出席一連兩日的國會聽證會，之前美國雜誌《New Yorker》放晒風，預告面對息口問題，聯儲局會繼續做牆頭草，息口及貨幣政策寬緊，要睇就業及經濟復甦有幾快，勢估唔到耶倫罕有地對股市指指點點，直指細價股、社交媒體及生物科技股估值高於歷史水平令人擔憂，口脗直頭同大行分析師一模一樣。

尋日港股收報23,523點，升63點，主板成交稍增至534億元，是五個交易日以來最多。不過見藍籌升幅排頭，居然係中信泰富（00267）及旺旺（00151），就知個市幾咁缺乏故事。

央企改革概念股尋日繼續做好，中建材（03323）、中糧（00606）及中糧置地（00207）都見追捧。對於重視基本因素的保守投資者，炒央企改革概念真係唔易買得落手，管理及經營效益愈好的，可以改善空間就愈細，同近日炒AH差價一樣，衰啲講就係愈垃圾愈無人吼先愈炒得勁，老實講真係買唔落手，筆者純粹得個睇字。

外電爆蘋果iPhone 6可能九月底正式開賣，但4.7及5.5吋屏幕兩款機種，後者可能因部件短缺問題而要押後，真定假都好，一日未出街，iPhone概念仲係有得炒，尋日信利（00732）、瑞聲（02018）及富智康（02038）都見做好。

iPhone概念繼續炒

其實瑞聲同富智康兩隻工業股，講到底都係因為蘋果概念先至可以攞到咁高PE，如果搵隻平平地又食正內地智能電話概念的股票，建滔積層板（01888）會係其中一個吸引之選。公司乃中國最大印刷線路板生產商，亦即係所有電子產品都用到的PCB板，過去兩年業績無乜增長，主要是個人電腦及手提電腦出貨量呆滯所致。

經調整產品結構後，集團今年開始受惠內地智能電話出貨量三級跳的好處。控股公司建滔化工（00148）六月兩次以2.856及2.886元增持，持股近爆燈的74.59%水平，現價3.01元離增持價唔遠，一四年PE 6.7倍估計6.4厘股息，估值較五年平均8.7倍低兩成三，一四年按預期可重拾增長，現價係風險細潛力大。