近排樓市氣氛好咗好多，逾億元大額豪宅都頻頻有承接，所以部分業主就趁勢將揸住嘅貴重物業推出市場。港島南貝沙灣5期近期有兩幢洋房同一幢孖屋放賣，以叫價計加埋達9.7億元。其中由施姓資深投資者或有關人士持有嘅孖屋，由於同類放盤絕無僅有，所以叫價達5.8億元，計落實用呎價約6.92萬元，如果呢個價賣到，將會係全屋苑新高指標。

港島南貝沙灣5期近期有兩幢洋房同一幢孖屋放賣。(資料圖片)

貝沙灣5期正放售的3幢洋房

市場逾億元嘅貴重物業一向放盤唔多，尤其旺市更加要用出盡法寶先可以打動業主放盤。

料創貝沙新高價

不過，最近貝沙灣5期就有幾幢洋房攞出嚟放賣，包括一幢罕有孖屋。據劉Sir所知，間孖屋由一資深投資者或有關人士喺一一年以共逾2.5億元買入。據土地註冊處資料，孖屋曾經先後承做按揭，舊年年尾曾經按咗4.9億元。

上述孖屋建築/實用面積加埋約12,513/8,380方呎，售價5.8億元，建築/實用呎價約46,352/69,212元，若以呢個價賣出，將會創屋苑新高。

至於另外兩幢5期洋房，由施姓資深投資者或有關人士喺一二年以共近2.8億元買入，今年四月曾經由銀主以每幢意向價1.8億元放售，由於放咗一輪都無咩聲氣，所以六月時曾經攞出嚟拍賣，每幢開價1.68億元，但最終都賣唔出。

三個月貴近一成

今次唔知係唔係業主見市況好咗，所以依家開價每幢要1.95億元，比四月時開價高咗約8.3%。兩幢洋房實用面積分別3,792方呎同3,588方呎，以售價計，實用呎價分別約5.14萬元同5.43萬元。

講開貝沙灣，今個月交投表現都唔錯，至今已經錄到約7宗成交。中原陳志強話，屋苑近期預約睇樓量多咗，但交吉盤源甚少，所以有交吉盤出現一般可以好快被吸納。

貝沙灣最新一宗成交係4期7座低層A室海景三房單位，實用面積約,157方呎，連車位賣咗2,300萬元，實用呎價約1.99萬元。該買家係附近租客，原業主揸咗個單位十年，帳面賺923萬元。