上星期外圍股市反覆，葡萄牙大型銀行BES違約，引發歐美股市一輪震盪，港股卻不為所動，上周五恒指收市跌5點，報23,233點，主板成交回升至514億元，國指升11點，收報10,379點。

恒指期貨走勢

近期港匯的強勢，同港股的牛皮局面形成強烈對比，以往港匯轉強，大家都預期港股多少能夠受惠，近日金管局多番入市干預避免港匯升穿7.75算之下，港股卻持續錄得四、五百億元成交。到底大量熱錢停泊在港元區所為何事？答案像謎一樣，但見上周中原編製的地產指數，與歷史高位一步之遙，莫非熱錢揀磚頭而放棄股票？

今年期指客如果把握唔到第一季的W走勢，基本上都好難有運行，六月份成個市得595點波幅，堅持日日炒過至心息，隨時換來多做多錯的下場。

其實，睇番大市自○七年高位31,958點，跌到落○八年10,676點海嘯後低位快將六年，港股每年的波幅有愈玩愈縮的趨勢。雖然同滬綜指比較，恒指已經算有交代，但對於唔理升跌，最緊要有波幅，更好是有單邊市出現的期指客來說，對住這種悶市，真係有苦自己知。