剛過去的半年結，乃九三年以來首次出現美股、美債、金價及新興市場指數等指標齊升的奇景。理論上，經濟好令美股升，經濟唔好才令美債及金價升，造成呢個現象，相信與美國退市、但由歐洲同日本接力維持寬鬆環境不無關係。

今個月的美國非農業新增職位仍然超過20萬份，代表過去五個月都有不錯的復甦，而目前服務業及製造業在第一季如此惡劣的營商環境下還進行招聘，反映企業開始對前景樂觀，有些更開始提高時薪，比去年增2%。

短線通脹未必急升，但筆者認為未來睇非農業新增職位，除睇數字外，更值得留意平均工時的變化。一旦因工資上升而出現需求帶動的通脹，配合油價維持高位，或令美國通脹升溫，尤其五月聯儲局比較鍾意觀察的核心PCE數據已升至1.5%，如果繼續飆升，就算主席耶倫繼續做其管理預期，但市場或會提早炒加息令美元回升，所以中線睇好美元的睇法無變。