由於昨晚歐洲央行議息，加上因今日美國獨立日假期而提早一日曝光的六月就業數據影響之下，教好友先擱下攻勢。恒指經周三急升後，昨日收市跌18點，報23,531點，主板成交565億元，即月期指日市收23,548點，較合理值高水15點。

恆指期貨走勢 2014/7/3

昨日若非午後淡友出多兩錢肉緊，在下午一點後測試好友底線，期指穿一穿23,500點落到23,496點，否則全日期指波幅，可能只係得100點左右。即市未能去到筆者建議無倉者可部署入市的23,380至23,450點區域，可見即使現貨成交萎縮，但純以走勢而論，市底頗強。

今次破位追買，老實講小弟又唔多怕再一次掉入上落市陷阱，主要考慮，是恒指去年十二月從24,111點跌至21,137點，中期反彈最後一隻攔路虎，即0.764阻力23,409點已成功攻陷。客觀睇，港匯強勢，加上前日港股以大成交破位，可見今次突破可信性相對較高。

即使外圍真係有冬瓜豆腐，破位不成再掉頭向下，一旦現貨短期再以低於23,409點收市，最多將23,500點開的期指好倉投降，輸極有個譜，反之扑中中期轉勢，肯定和味。