暑假就快到，最近租務市場已經率先起動，近期各區都錄到高價租務成交。劉Sir聽將軍澳區代理講，該區天晉1期有個高層戶，以月租5萬元租出，料創全區標準戶新高。內地學生就繼續高價搶租盤，據講有3名內地學生就夾份租粉嶺中心一個大兩房戶，實用呎租29.6元。

內地學生積極搶租，令市場頻出現貴租成交個案。（資料圖片）

各屋苑近期租務概況

租盤短缺，令到租金有升冇跌，聽代理指出，將軍澳向來少有大面積嘅租盤供應。

天晉5萬火速承租

所以日前天晉1期7座高層A室，建築/實用面積約1,415/1,108方呎，以每月約5萬元放租，話咁快就以開價租出，建築/實用呎租約35.3/45.1元，預期月租創全區標準戶新高。相比業主一一年購入價，租金回報率約有3.45厘。

近期搶租最積極必然係內地學生，令到市場頻頻出現高租成交。好似沙田第一城37座兩房戶，由3名內地學生以約每月約1.23萬元租咗，實用呎租約43.3元，月租估計係屋苑兩房戶高位。

中原陳燮佳話，粉嶺中心六月錄得14宗租務成交。好似L座低層1室大兩房戶，實用面積473方呎，由3個將會嚟中文大學讀書嘅內地學生以每月1.4萬元承租，實用呎租約29.6元，創同類單位新高，並且先繳付一年租金。以業主今年三月買入價計，租金回報率有5厘，都幾和味。

該行招錦昌都話，近期有唔少內地學生喺沙田區睇租盤，沙田河畔翠華花園B座中層7室，實用面積280方呎，以月租1.08萬元租出，實用呎租約38.6元，亦係同類單位新高。

上述單位租客係兩名內地女學生，今次亦係先付一年租金入市。該公司話，鰂魚涌太古城今個月租賃市場都好活躍，至今已錄到8宗個案。

濱南租務連錄五宗

美聯劉偉健表示，該行單日促成兩宗內地學生承租紅磡海濱南岸個案。其中5座中層J室，實用面積約589方呎，就由內地學生以月租約2.3萬元租咗，實用呎租約39元，屋苑今個月已錄得5宗租務成交。

美聯又話，沙田市中心屋苑六月錄到約115宗租務成交，按月多咗約2.48倍，現時全區淨番17個鎖匙租盤。

據悉，有內地學生日前只係睇相，就以月租約1.35萬元租咗沙田偉華中心4座高層G室，實用呎租高約45.5元。