魚缸Blogger：中信21世紀有望突圍

阿里巴巴揀定紐交所上市，而畀佢入股嘅中信21世紀（00241）同文化中國（01060），分別有意改名叫做「阿里健康信息」同「阿里影業」，上周五兩股各升0.5%及9.2%，至6.04元及1.78元。查實中信21早市曾高見6.3元，可惜升勢無以為繼，睇番呢個半月股價喺波幅區間5.65至6.41元停滯不前，話唔定會於阿里上市前搵機會突圍！

中信21去年營業額激增2.79倍至6,021萬元（經重列），虧損縮至647萬元，毛利率高達76.9%，原因係期內PIATS獲藥品生產商、分銷商、藥房及醫療保健機構等廣泛應用，進一步確認PIATS的盈利能力，去年亦都開始應用於食品飲料、農資及化妝品等產品。

同時，公司得到阿里支持，一齊推進藥品訊息化平台建設，去年已將藥品電子監管網遷至其雲計算平台，提高系統性能，且納入電子監管的藥品亦有所擴大，國家基本藥物（一二年版）全部品種已基本完成賦碼工作，長遠潛力可憧憬。