期指結算日，無見到好淡友相互廝殺，上周五大市延續整個六月的「腌悶」味道，恒指收市升23點，報23,221點，全個月恒指在22,802至23,397點，合共595點波幅內上落，是今年頭六個月以來最窄幅度的月份。

恆指期貨走勢 2014/6/27

即月期指以23,193點結算，七月合約收23,107點，較除息後合理值高2點，未見轉倉盤對後市有太大啟示。

近兩年的常態，是大市波幅愈玩愈縮，近期的情況變本加厲，恒指波幅指數上周五繼續在低位徘徊，收12.43。值得留意，年初恒指波幅指數曾跌至14樓下，之後急彈，大市在短短幾日內由23,000點樓上跌至21,197點低位。

當然，波幅指數低同大市短期轉勢無必然關係，觀乎連續六日沽空佔大市成交比例都縮到單位數水平，偏低的沽空，亦都意味大市挾淡，逼淡友投降爆升的誘因唔高。

今日係基金半年結，會否有粉飾櫥窗活動，是期指玩家所要關注的。總結上半年市況，好友唯一的成功感，可能是今年大市四次挑戰23,000至23,500點阻力區，但就以六月的今次，維持時間最耐，但到底是圓頂派發收場，抑或成功築起支持再上，筆者都睇唔透。