半年過去，期間恒指上落雖逾兩千點，但以上周五收市點數計，較去年底收市水平差距不到1%，繼續在21,000至23,000點水平玩大型上落市。上周五人行暫停正回購，有說法指係確保在敏感期市場流動性維持穩定，內地拆息連日下跌，可以肯定今年「錢荒」不再來。展望下半年，若第三季乃今年市況轉捩點，末季睇升，則能否在第三季的波動市中捉正上車機會，將決定看官今年的投資成績好壞。

隨着中俄就供氣達成協議，燃氣股前景可看高一線。（資料圖片）

有消息指政府擬修訂一簽多行，每周最多來港一次。老實講，富貴表叔即使來買奢侈品，都唔會日日來，一個禮拜來一次都夠皮，所以若然如此修訂，對香港奢侈品消費市道影響應唔大。講到奢侈品股，阿莊早前亦提過，每年第二季都係金飾股的低潮期，第三季不妨留意收集機會，博坐到年尾又可以收割！

阿里巴巴等睇好戲

阿里巴巴落實在紐交所上市，股票代碼係「BABA」，有指上市日或定於八月八日。淡市缸邊吹水，口痕友話，「八月八日」呢個日子，樂觀啲諗係「發」月「發」日好意頭，但悲觀啲諗係互聯網交談術語「88」「拜拜」，即係意味今個科網熱潮會隨着阿里上市完成巨額集資而向大家Say Goodbye！也許「一朝被蛇咬」的香港股民對馬雲先前施以超高炒作「技藝」，將本來在港掛牌的阿里私有化之舉印象深刻，今次會唔會又係上市價攞到盡之後冇益人，唔想做馬雲對手，就行埋一邊擔定櫈仔等睇戲！

上周業績股成焦點，其中，中國燃氣（00384）連升兩日，上周五創五十二周新高16.22元，收報15.46元，一周升幅約15%。除了績佳，管理層對行業及公司的銷售前景予以樂觀評價，亦觸發投行紛紛作出重估。事實上，隨着中俄就供氣達成協議，將確保穩定而可觀的氣源，加上政策支持使用潔淨能源，燃氣股前景可看高一線。

北京控股（00392）旗下的北京燃氣，亦在燃氣行業手執牛耳，中燃股價創新高，北控手持中燃的兩成一股權身價亦水漲船高。其實，北控作為一家綜合企業，其持有的燃氣業務具重組誘因。即使其維持現狀，現價預測市盈率為18倍，估值仍處合理水平。今年目標可定在80元大關，相等於預測市盈率20倍，重要支持在65元水平。