人稱「股壇神算」的陸東（Andrew Look）縱橫金融圈多年，投資眼光獨到眾所周知。現為Look's Asset Management董事總經理兼投資總監的他，面對來自不同院校投資學會的精英專程「拜師學藝」，他除了毫不吝嗇地率先傳授基金經理的實戰心得，亦不忘循循善誘，多番勉勵後輩要認清個人事業方向、追尋理想。

陸東（左一）投資眼光獨到，今次更親身教授幾位同學自己的投資秘笈。

揀股先睇基本盈利

「低買高賣」、「股價跌穿一成要止蝕」等法則早已成為「缸湖」中的金科玉律，向來信心爆棚的星級分析員陸東，個人另有一套投資理念。他一向奉行價值投資法，技術分析僅用作參考，認為揀股先睇underlying earnings（基本盈利）而非只看股價，揚言不會因股價升跌而輕易心動。「股票可以愈跌愈貴，或者愈升愈平。如果股價跌九成，但原來盈利跌足100%，以估值嚟睇，股份反而貴咗，咁梗係唔抵買啦！」

科網股「計唔到數」

以市場間歇性熱炒的科網股為例，他明言「計唔到數」，目前盈利增長預測未足以支持相關企業股價大升，認為板塊於下半年仍然「難成氣候」。

股價走在事實之前

搵到平價股後，他建議找出股份重新評級的trigger（誘因），以及分析其現時股價是否已反映潛在正面或負面因素。「股價永遠行先過fundamentals（基本面），如果股價已反映無限前景，咁未來上升空間真係好有限！」

他特別點名提到中海油（00883）旗下子公司中海油服（02883），「公司近年產量持平，但石油儲存量卻不斷上升，即係管理層應該睇好後市；如果行業有咩郁動，麵粉價一定比麵包價升得快。」

分散投資避險非上策

坊間「芬佬」常言道：要識分散投資才可降低風險，但陸東不認為這套行得通。「如果佔投資組合5%都無，咁不如唔好買啦，況且當大市差時，其實好股、壞股都會一齊跌，例如滙控（00005）跌，大新銀行（02356）、永亨（00302）多會跟住跌。美國歐洲市場就唔同，人哋板塊夠多，市場夠深。」

組合瞄準舊經濟股

他指，「有啲行家買入近80隻股，多到連自己買咗啲咩都唔記得，咁我就覺得唔係好對得住個客人囉！」他又透露，其管理基金目前的投資組合中，主要為能源股及息口敏感的舊經濟股，如內銀、內險及內房股等。

追蹤國策股無往不利

令股價上升的最大誘因當然是受惠政策帶動，陸東相信今年「三中全會」提倡的潔淨能源，將成長期國策，利好個別能源股。雖然其去年買入的光大國際（00257）及華電福新（00816）均已止賺沽出，但在內地能源發電未完全轉型至替代能源前，仍看好部分傳統能源股份，包括內地「兩桶油」─中石油（00857）、中石化（00386）及華能國際（00902）。

留意資訊 自我質疑

要成為出色的基金經理，原來要反覆地自我質疑。陸東稱：「每朝起身我都會以最新既資訊challenge（質疑）自己，問自己係咪需要作出修正；世界每日都千變萬化，所以會不停咁測試自己嘅thesis（理論）。」

港股年內難見牛市

陸東慣用「盈利收益率差模型」（Earnings Yield Gap Model）計出恒指合理值，被坊間冠名「股壇神算」。他稱自己每年都會計算，但由於今年推算的合理值較坊間預期低「太多」，故不願透露，但仍料下半年維持上落市格局，恒指介乎21,000至24,000點；在企業缺乏盈利增長動力、本港就業和資產市場轉差，以及零售市道疲弱下，相信「未來六至十二個月港股都唔會出現牛市」。

在板塊方面，受惠微刺激政策及預期內地將下調存款準備金率（RRR），他表示自次季起已增持內銀股。「早前內銀獲准發行優先股以擴充資本，估計可加快迎合《巴三》（《巴塞爾協定三》）要求；而雖然內地經濟增長放緩，但內銀壞帳未見急升，反映目前信貸風險仍可控。」

在本港維持「辣招」下，投資本港地產及銀行板塊仍未合時宜。他指，本港樓市進入調整期已成事實，加上預料資金成本將會上升，難見企業未來盈利增長動力。

港交所商機龐大

本港樓市方面，他去年曾料在最差情況下，未來兩年會跌五成，但觀察多月後未見大幅走資，故維持降幅40至50%的預測，但將下行周期延至三至四年。其他不宜買入股份亦有濠賭股及奢侈品消費股。

他亦繼續鍾情港交所（00388），無論個人及管理的基金都大量持股，除了因其獨霸本港證券交易市場的業務特性外，也因其放眼內地資本市場所帶來的龐大契機。但說到將於十月推出的「滬港通」，他則強調「（中央）唔係做出嚟醒你班中環股票佬」，『滬港通』明顯只是實現人民幣自由兌換的小插曲，而在人民幣離岸市場推出更多人民幣計價產品，是當中必經的過程。」

「唔鍾意呢行，搵幾千萬冇你份！」

面對幾名「學生哥」，陸東一本正經地問：「你係咪真的鍾意金融？無興趣就唔好讀喇！」

他深信，了解自己興趣和專長才是成功關鍵。「你話金融好搵喎，聽講啲iBank一年出幾千萬Bonus（花紅）喎！如果你唔鍾意做，搵幾千萬嗰個唔會係你，三個月後被人炒嗰個就係你！唔好嘥時間去追求人地嘅夢想，要追求自己嘅夢想。你鍾意賣菜都得，賣得好，你都會發達！」

「讀書叻同做嘢兩回事」

他亦透露從事投行分析員的辛酸史。「我哋做iBank，平均每星期要工作96個鐘，一星期七日，平均每日都要做十幾個鐘。」

陸東於○○至○八年任職瑞銀，曾任瑞銀亞洲董事總經理，不時要遠赴世界著名院校招攬人才，閱人無數。他認為要投身iBank行列，單憑學術成績優異是無法突圍的。「讀書叻同做嘢叻係兩回事，做嘢叻既人除左基本功打得好之外，亦好講求良好嘅表達能力。」

他建議大家趁求學階段參與辯論組或話劇組，把握機會訓練自己、增強個人自信心。

席間有學生問及，部分年息高的股份，如中國銀行（03988）是否值得定期買入。但陸東認為，買入追蹤恒指的盈富基金（02800）或更可取，因為該基金會跟隨恒指成分股作調整，而被納入恒指的均為優質股。