魚缸Blogger：亞太衞星盈利能力強

近月亞太衞星（01045）成功打破五窮六絕魔咒，股價由四月低位8.1元，升到一年高位12.2元，期間累積升幅五成，已經突破四月推介時所定的目標12蚊，有見佢喺11蚊邊抖咗一陣，尋日上升4.3%至11.9元，14日RSI處於合理水平，今轉阻力上移到13蚊。

亞衞主要從事在軌衞星、衞星電視廣播及上行服務、衞星電訊及數據中心服務等。近年公司業務發展迅速，○八年營業額同純利分別得4億元及4,958萬元，去年已增至11.3億元及5.4億元，反映行業獨特之餘，盈利能力唔可以睇小。

前年亞太7號衞星成功接替退役的亞太2R衞星，因為性能同覆蓋能力較高，為佢帶嚟增長動力，去年亦已開展亞太9號衞星項目，料於明年末季發射及在軌交付，未來收入貢獻值得憧憬。雖然亞太區、中東及非洲衞星轉發器市場供給大增，不過其在軌衞星使用率亦維持較高水平，且增值服務持續發揮協同效應，相信隻股仍能穩中有升。