Fundman睇市：創維有翻炒理由

個市靜局無乜消息，新晨動力（01148）因為瑞信出報告唱好，股價抽6.1%，收報5.02元，成交九球一，是三個月以來最旺。連呢隻街貨乾到暈的車股都因為一份報告而有捧場客，證明個市幾咁無嘢炒！

反而阿媽華晨（01114）消息比較實在，內地傳媒報道，公司正與寶馬提早傾緊將合資協議由一八年延長到二○二八年，有分析認為提早延長合資期，可能同未來擴張及引入新車款有關。睇圖近期華晨走勢強到不得了，有直指去年14.66元歷史高位之勢，延長合作消息醞釀期間，似乎有向上攻堅的條件。

潤泥未宜博反彈

尋日股價撻落4.65元見今年新低的華潤水泥（01313），收市後發盈喜，預告今年上半年因為水泥及熟料銷售價格上升，毛利率改善，盈利會有顯著增長。

回顧潤泥一三年上半年業績其實麻麻，全年盈利33.3億中，上下半年分別貢獻11.4億及21.9億元，煤價低企及水泥價反彈的好處，主要在下半年反映，由於比較基數低，加上今年初水泥價仲好硬淨，上半年業績按年大升應是預期之內。反而，近期內地樓市銷售嘆慢板，市場擔心發展商會放慢開發步伐，六月全國水泥價格有回落迹象，更值得股民關注。按大行盈利預測，現時潤泥的預期市盈率約為8倍，合理但未夠殘，博反彈有點雞肋味道。

4K電視增長強勁

創維（00751）公布截至三月底止年度賺12.54億元，按年跌16.4%，睇番中期賺7.19億元，換句話，去年五月節能家電補貼政策終止後的影響，仲未完全過去，業績仲跌緊。不過管理層看來頗有信心，今年銷售可回復增長，一來去年海外銷售的不俗表現，預計可延續，其次係公司期望售價及毛利率較高的4K電視，去年增長達1.83倍，賣掉180萬部，今年可以殺出一條生路。

尋日創維股價抽升3.3%，收3.67元，斷估同業績符合大行預期無直接關連，事關以下半年賺5.35億元計，即使賺錢能力可以止住唔再跌，今年盈利講緊都係11至12億元，市盈率8至9倍，相比過去創維很多時市盈率以單位數出現，未至於好平。但留意日前中央收緊網際網絡電視監管，勒令一些未經審核的視頻apps停止運作，意味近年掀起割喉式減價的網絡電視公司，如意算盤隨時打唔響。假如中央長遠繼續收緊這類網絡視頻服務，傳統電視生產市場秩序有機會恢復，創維就有翻炒的理由了。