呢期出證券行，卜架冇幾多個準時坐定定，反正成朝個電話都冇響，返同唔返行分別不大！阿莊在金魚缸日子唔短，亦深明人活着總要有希望的道理，相信依家正係黎明前的黑暗，捱過咗又係一片光明，期望末季滬港通啟動以及內地經濟提速，能給兩地魚缸注入新動力！

持續低息環境有利美國經濟復甦，利好於當地經營電動工具業務的創科。（資料圖片）

過去淡靜市不難發現有垃圾股可以成跌市奇葩，皆因呢類股多數係細價好炒，股價長期低迷，部分貨源極為歸邊，唔難短炒一轉，反正炒家缺乏炒作對象，飢不擇食乜都炒得一餐。

炒殼股要量力而為

不過，呢期淡市唔係炒仙股，而係炒殼股。好似尋日排在升幅榜首位的，正係主要股權獲洽購的國華（00370），股價升34%；另南華集團（00265）、達進東方照明（00515）都係炒賣殼概念。只是，最終有幾家可以生米煲得成熟飯，大家心裏有數，總之要明白投機行為存在高風險，量力而為。

美股呢期好似反覆向上，但股市強勢係真正反映經濟好轉，抑或純粹係低息下的資產泡沫使然，實在搞唔清！阿莊傾向相信，美息在未來六至十二個月都會維持不變，持績的低息環境理論上有利當地經濟復甦，專營美國電動工具市場的創科實業（00669），業務有望延續好景。

創科在過去四個財政年度盈利均維持雙位數字增長，去年度純利達到2.5億美元，按年增長24%，毛利率升0.7個百分點至34.2%。其實，呢幾年創科業績咁標青，主要因素唔係行業或市場表現，而係公司重視產品創新的策略奏效，成功革新專業人士與消費者在家居及工作場所處理項目工程的方式，搶佔市場份額，加上致力精簡生產流程及推動智能自動化，提升生產效益，成績斐然。

以創科現價24.15元計，一四年度預測市盈率17倍。對於一家業務處收成期的優質工業股而言，呢個估值雖然唔係便宜，但亦唔算高不可攀。策略上，22至23元是一個較大支持區，向上主要阻力則在26至27元。目前市況下，可候回吐至支持區才落場跟進炒波幅。