自從政府將雙倍印花稅制納入埋工商舖物業範圍後，商廈買賣就每況愈下，上半年登記料475宗。有地產代理老友就預期，今年下半年商廈成交量亦難超越500宗關口；早兩年升得唔錯嘅樓價，今年升勢將會大幅放緩，下半年估計整體樓價只係升約5%以內。非核心商業區內的商廈售價因樓面需求減少，有機會跌5至8%。

近年商業樓宇買賣登記宗數

利嘉閣（工商舖）陳偉良同劉Sir講，今年初美國宣布削減買債，加息壓力及經濟下行機會突然增加，投資者入市變得審慎保守。

全幢成交 半年僅6宗

上半年商廈買賣登記估計只得約475宗及109.24億元，比舊年下半年銳減24%及55%，登記量勢創歷史新低紀錄。今年上半年大宗物業買賣唔多，只係得約6宗全幢商廈買賣，比舊年再少1宗，減少14%。

樓價方面，今年頭四個月整體商廈樓價只係升咗約1%，預期上半年升幅都只係得2%以內，比起一二年全年嘅24.8%同一三年全年嘅9%升幅，明顯少咗好多。

滬港通有望刺激租售

租金情況都差唔多，預期上半年整體租值升幅最只有約1%，升勢遠遠唔及一二年全年嘅7.7%及一三年全年的7.5%。

該公司高級區域董事何紹榮預期，受惠滬港通有望年底開車，未來相信會有更多內地金融機構增租樓面，對商廈租售需求有一定推動作用。

佢預期下半年整體商廈買賣交投可以維持約480宗水平，同上半年差唔多，而樓價升幅會比上半年好，但都係升約5%以內，其中中區甲廈估計可以升3至5%。

但一啲非核心商業區商廈售價因需求減少，佢預計下半年售價會跌約5至8%。而下半年整體租金則有約1至2%升幅，但港島乙級商廈租金就機會跌5至8%；東九龍甲廈租金更可能跌5至10%。

另外，中原話，屯門億豐集團大廈全幢會以招標形式出售，幢大廈總樓面約11萬方呎，部分交吉及連租約方式交易，該物業係原業主○六年以7,200萬元購入。