魚缸Blogger：東風踏入高增長周期

有指內地電動車免徵購置稅政策或於七月出台，消息刺激一眾概念股急升，東風集團（00489）喺大行唱好下，再升1.5%至13.5元，即市創下13.6元的一年新高，但見牛叉縮窄，唔排除要整固吓先至再上，短線回調若唔跌穿20日線12.5元，博佢踢上15蚊。

東風去年營業額激增5.1倍，至372.6億元人仔，純利增長15.7%至105.2億元人仔，期內毛利率亦升0.6個百分點至19.8%，而今年首季更多賺1.4倍至34.7億元人仔，表現突出。近年公司加強新能源汽車業務，其純電動轎車東風風神E30已開始量產，加上內地話年底前要淘汰大量高污染及舊汽車，有國策扶持下，股價應可受惠。

另外，摩通出報告叫人買，話東風經歷兩年低潮後，估值正進入兩年重估期，利好因素包括合營車型周期強勁、盈利表現帶來驚喜，同埋公司佔據內地高增長市場，並料東風日產今年盈利貢獻大約六成，畀佢目標價22元。