經過周一急跌後，大市初步搵到支持，昨日恒指升75點，收報22,880點，主板成交439億元，周五結算的六月份期指，日市收報22,886點。

恒指期貨走勢

以昨日大市反彈高位22,946點計，僅補回周一即市由23,393跌至最低22,802點的24.3%下跌幅度，加上偏低成交，大市乏力不言而喻，大戶會否趁買賣兩閒，在結算日前殺多一浸，將即月指數波幅擴闊？始終靜市下，淡友所需彈藥唔多。但如果從牛熊證角度，暫時街貨以熊證主導，反之牛證要落到22,700至22,799點街貨區，只殺到相當740張期指的街貨，照計殺牛誘因不是太大。

外圍平靜，使筆者傾向相信大市仲未脫離上落市，現時入市難度在於，以今浪由五月低位21,680升至23,397點見短期浪頂，回吐0.382可見22,741點，即使回吐升幅一半，都只係22,539點，即使在未來幾個交易日發生，意味六月波幅不過擴大到858點，較過去五個月平均波幅計仍是太少。

結論係，賭大錢的實不宜現時入市，若唔賭唔舒服，等大市出現俯衝後買貨，抑或細細注博結算前殺多浸，悉隨尊便。