個市隊完一日，尋日成交立即縮晒，總成交得439億元，創今個月新低，恒指升75點，收報22,880點，對比前日無緣無故急跌389點，博反彈的投資者零星落索。

為搶奪4G市場，今年內地手機商的出機目標都相當進取。（資料圖片）

太陽日誌

綜合大行預測酷派業績（港元）

今日開始去到下個月七號，10個交易日內有18隻新股排住隊上市，日日都有得抽獎，不過難免令魚缸失焦。趁新股熱，四月多達29間保薦行幫佢上市一樣撻Q收場的豬肉佬萬洲（00288），消息話準備降價兩至兩成五捲土重來，一句講晒，舊年71億美元鯨吞美國SmithField筆債始終要還，依家要睇萬洲為咗集資，到底可以去到幾盡。

靜市中，酷派（02369）爆升13.3%，收報2.04元，夠晒搶眼，事緣公司發盈喜預告首五個月盈利大增，不過，事實愈近iPhone6盛傳的九月推售日期，智能手機相關股份的吸金力愈強，富智康（02038）、瑞聲（02018）強勢畢呈，尋日比亞迪電子（00285）仲創埋四年新高。

酷派榮登一哥寶座

內地三大電訊商去年十二月正式獲發4G牌，酷派亦打正旗號以本身CoolPad品牌推智能手機，一三年業績報表已預告，今年會把大部分資源投放在4G智能手機市場。早前有調查機構報告話，五月其4G手機於內地的市佔率升至兩成三，榮登一哥寶座。

去年底史提芬推介過佢，理由好簡單，係如果出貨量不及佢嘅小米，向私募基金集資估值都叫緊100億美元，對比之下，目前得87億港元市值的酷派，若非被低估，就肯定係小米叫價過高。只係估唔到佢股價可以咁波動，二月見2.68元三年新高後，五月掉頭跌番四成八，去到1.41元，近期因4G出機數字勁靚又炒過。

如果對Android系統有認識，都知全部相關智能手機都預載Google開發的Android軟件，若非對牌子死忠，用三星、索尼、小米、聯想（00992）以至酷派，講真分別唔係咁大。而睇番跟iPhone硬件規格同級的Android手機，售價平前者一大截，撇除蘋果頂上光環享有暴利條件的可能性，合理推斷，如果軟件一樣，用家體驗分別唔大，Android用家對價格敏感度比較高，可以預期。上官網睇，酷派手機售價介乎599至1,888元人仔，性價比唔錯，但同小米一樣玩飢餓式行銷，定個低價，再要指定時間推售畀消費者上網搶購，想買部試吓都唔係咁容易。

毛利率不及白家電

到底Android手機生產有幾多利錢？一三年酷派196億元銷售額賺3.48億元，純利率1.78%，低過出名利潤微薄的電視及白家電生產商，例如創維（00751）一三年有4.2%，海爾電器（01169）都有3.3%。今年酷派狂谷4G機，第一浸新產品毛利及利潤率抽升是常識，不過對手聯想、小米、華為、中興（00763）今年都訂出相當進取的出機目標，之後會唔會又陷入泥漿摔角，是捧場客要緊貼市況昅到實的最大風險因素。