期指攻略：波幅擴大候低開好倉

昨日恒指跌389點，收報22,804點，早市高位23,393點，破唔到六月上旬高位23,397點之後，午市見愈跌愈多，有趣的是，直到收市後都見唔到有合理解釋點解個市要跌咁多。

以昨日跌幅，主板成交得580億元，比上周五多70億左右，主觀睇沽壓同點數跌幅唔多匹配，再留意昨港匯變動唔大，仲係貼近強方兌換保證價，內地股市無大變化，外圍也沒有特別壞消息，昨日跌市似係衍生工具莊家臨近月底，因即月波幅唔夠而作出的一次震倉。

技術上，經昨日一跌，恒指已失守21,680至23,397點升浪的0.236回吐22,992點，昨低位22,802點，差幾十點去埋0.382的22,741點，如果大市23,397點是六月高位所在，即月波幅暫時得595點，即使筆者不睇淡後市，由數據上，感覺周五期指結算前，即月指數波幅仲有擴大空間，但追沽興趣唔大，反而想等機會低位再買過。