環球經濟穩定，企業對寫字樓嘅需求增加，租用成本自然上升。代理行一份最新數據顯示，全球寫字樓租用成本喺過去一年上升咗約2.3%。喺咁多個市場入面，香港中環就繼續排喺第二，平均每呎約157.2元，僅次英國倫敦韋斯滕德嘅180.2元水平；而香港西九龍嘅表現就差少少，租用成本按年跌咗8%，令到排名跌咗一級至全球第六位，呎租約104.5元左右。

西九龍商廈由於新供應增加，導致去年呎租回落。（資料圖片）

寫字樓租用成本最貴10個市場

劉Sir參考世邦魏理仕《主要寫字樓租金成本》調查報告，截至今年第一季，全球寫字樓租用成本按年升約2.3%。

美洲年升3.3% 倫敦稱霸

當中以美洲錄得3.3%增幅最多；亞太區都有約2.9%升幅；但歐洲、中東同埋非洲表現就麻麻，出現約0.1%嘅跌幅。

呢個報告係統計全球126個寫字樓市場，雖然香港中環寫字樓平均每呎租用成本未及得上倫敦韋斯滕德，但繼續穩守第二，平均每呎按年升約3%至157.2元；但係西九龍就失色咗啲，按年跌約8%至104.5元，相信係市場開始出現新供應，令到啲租戶態度轉趨審慎所致。

至於內地市場亦不容忽視，劉Sir發現，北京金融街、同埋核心商務區呢兩個市場，寫字樓租用成本每呎約126.1及121.6元，排名第三及第四位。

世邦魏理仕簡儒德向劉Sir分析，話香港整體寫字樓需求回升，加上滬港通政策帶動，所以商廈租金有支持位。該行仲講到，雖然租戶會着重控制成本，但核心區甲級商廈需求殷切，睇怕下半年租金都會上升。

另政府起動九龍東令該區工商市場受到注視，部分特色單位業主都放盤試下水溫。美聯商業許少娟話，觀塘天星中心高層複式連平台特色戶，面積約9,610方呎，以意向呎價8,500元放售，意向價約8,168.5萬元。如果以呢個價賣出，呎價就會創該廈新高。

荃灣南星工廈賣3.8億

市場最近亦錄1宗過億元大額工廈成交個案，荃灣國瑞路南星工業大廈以3.82億元登記賣咗。

睇番註冊處資料，新買家係益本有限公司，董事包括羅正杰同埋羅可欣，係堡獅龍（00592）羅氏家族成員。