眨眼又到六月下旬，內地市場流動性總算無風無浪。近日港匯異動，係七月初中央出手維穩，抑或係滬港通十月開通前，資金開始回流港股作部署，暫時難以下定論。

滬港通開通後，沒在A股上市的中移，對內地投資者極具吸引力。（資料圖片）

不過，睇上大人呢期外訪向老外大派定心丸，六月份經濟數據料可進一步顯示經濟回穩，加上定向降準效應逐步展現，料可為兩地股市帶來支持。七月第六輪美中戰略與經濟對話將在北京舉行，參考第五輪會議完結後魚缸反覆回揚，今年係咪冇例外就要等着瞧。

賽晶無持貨理由

呢期殼股瘋炒，但成功博中的機會唔大，公司一句「傾唔成」，股價可以迅即打回原形，故沾手者必須要夠狠心手起刀落執行止蝕。另外，年初提及攞到新合同的賽晶電子（00580），上周突然發盈警，原因係專案延後及交貨期推遲而令收入大減。老實講，過去半年鐵路業景氣持續改善，公司盈警非關行業盛衰，而係內部經營問題，盈警前小股東無法掌握，只有眼白白睇住股價不斷向下。早前失守大位未及止蝕的話，此刻更沒有繼續持貨的理由。

回看大價股，上周五三隻中資電訊股中，僅中移（00941）股價報升收市，聯通（00762）同中電信（00728）均微跌收市。事緣中移公布的五月份營運數據顯示，截至五月底，其4G客戶共有810.9萬戶，按月淨增311.1萬戶，較四月份的按月淨增200.5萬戶，增速明顯加快，抵銷了3G上客量增長放緩的影響。

阿莊都唔止一次講過，在三大中資電訊股之中，論業務表現，會傾向選擇聯通。不過，誠如上文所述，不排除在滬港通開通前，有資金重新流入港股作部署。中移係重磅股唔使多講，其電訊品牌，內地消費者熟知，但現時在A股市場卻無法投資中移，他日滬港通開通，中移在A股投資者眼中的吸引力不言而喻。有了呢個因素，站在股份供需的角度睇，未來六至十二個月，中移的確不宜看淡。

另一角度睇，早前公司證實，與同業研究合組鐵塔公司，成事的話料有助減輕資本開支，對股價起支持作用。以上周五收市價75.85元計，中移往績市盈率不到10倍，息率4.3厘，估值亦唔算貴。若然下半年滬港通效應，想押注相關概念股，中移係值博之選。