政府將會喺短期內公布新一季度嘅賣地計劃，不過依家賣地表大部分土地仲未完成改劃程序，所以可以喺下季推出嘅住宅地相信只得6幅。當中以馬鞍山白石耀沙路及屯門景秀里地皮較有睇頭，兩幅地面積分別約25.3萬同埋11.9萬方呎，劉Sir推算呢6幅土地可以提供超過2,200個單位，初步估值加埋超過52億元。

馬鞍山白石耀沙路住宅地，佔地逾二十五萬方呎。（資料圖片）

高緯環球張翹楚表示，今年有不少地皮未準備妥當，無法推出。（資料圖片）

預計可於本財政年度第二季推出住宅地

劉Sir睇到地政總署資料，發現原來預計可以喺本年度上半年推出嘅住宅地，得番6幅仲未推出，相信有機會納入即將公布嘅新一季賣地計劃，呢6幅土地分布不同地區，包括馬鞍山、屯門、大圍、粉嶺、大嶼山同埋鯉魚門。

白石地呎價料三千七

數到面積最大係馬鞍山白石耀沙路住宅地，佔地約25.3萬方呎，用地積比率1.53倍計，總樓面約38.7萬方呎。

劉Sir知道城規會早排同意地政總署增加呢幅地皮發展密度，仲將每個單位嘅平均面積縮減一半，以致提供伙數大增1.38倍去到550伙。高緯環球估計地皮每方呎樓面地價約3,700元，估值約14.3億元，係上述6幅地皮估值中最高嘅一幅。

至於屯門第4區景秀里地皮都有番咁上下規模，佔地約莫11.9萬方呎，預計提供大概720個住宅單位最多；另外三幅新界地皮，包括大圍大埔公路、粉嶺聯和墟聯興街、大嶼山長沙住宅地，就預計提供約莫40至300個單位。

鯉魚門徑須建停車場

一向少供應嘅市區地只有1幅鯉魚門徑地皮，佔地約3.5萬方呎。由於地皮依家係用作停車場用途，所以地盤須提供200個公眾停車位，而有關面積須納入總樓面入面，預計地皮樓面呎價約4,000元。

賣地表入面只有上述6幅住宅地皮預計可以喺本年度上半年推出，即係仲有22幅地要等到下半年先至有機會供應。

老友高緯環球張翹楚就覺得，呢個情況同上年度有啲相似，由於大部分地皮並未準備妥當，應該推唔切，所以建議考慮加快推出鐵路項目。