恐怕唔少市後評論，都會話港股今個星期初的悶局，緣於市場等待一連兩日美國聯儲局議息結果。但維持息率不變及每月再減百億美元買債規模，幾乎毫無懸念，說穿了，大家只係等運到至真。

恒指期貨走勢2014/6/17

恒指昨日全日115點波幅，與周一的108點比較，論沉悶程度，是五十步笑百步。恒指收市跌97點，報23,203點，主板成交491億元，期指日市收23,156點，成交得3.3萬張，國指跌55點收10,466點，國期收10,351點。

依家仲有九個交易日先至捱完六月，月初至今恒指得447點波幅的困局會唔會維持到月尾？好難講，經過昨日一跌，手上國期好倉帳面利潤跌番一半出街，得番53點，炒期指上落仲細過賭波，認真罕見。今日筆者決定平倉算數，專心睇波。

如果堅持唔炒過唔舒服，可以吼冷門，昨日恒指波幅指數跌至12.73，是一三年一月以來新低，整體大市引伸波幅縮水，昨日收市攞一百點出嚟，經已夠同時做23,600點認購及22,800點認沽長倉，小注試試，睇未來幾日個市會唔會有奇迹出現，變成價內機會有限，但博溢價一升食胡並無不可。