前晚華爾街三大指數變動唔大，市場等美國聯儲局議息結果。另一方面，英倫銀行行長卡尼上星期指當地經濟增長加快及失業率快速回落，央行距離加息之日愈來愈近，匯市炒家磨拳擦掌，賭英國比美國更早加息。

未到滬港通開通，內地券商已急不及待來港爭櫈仔。（資料圖片）

太陽日誌

尋日英國統計局公布五月通脹率，由四月的1.8%跌到1.5%，創下○九年十月以來新低，同日官方公布的四月樓價升9.9%，是四年以來最大年度增幅，英國央行到底要避免通縮出現，抑或壓抑樓市升勢為先，頓時受到考驗。姑勿論點，今浪英鎊要攻破1.7大關，似乎唔係咁順利。

尋日恒指全日115點波幅，收市跌97點，報23,203點，主板成交得491億元。指數跌幅有限，但稍為令人擔心的，是升跌股份比例繼續惡化，上升及下跌股份466及903隻，後者幾乎是前者的一倍。指數破位後唔多願郁，似乎一批缺乏耐性的投資者，忍唔住高位減磅。

隆成變淨現金公司

上市十五年的嬰兒車生產商隆成（01225），向美國Dorel出售本業套現9.3億元，準備把當中的2.27億元或者每股0.3元，以特別股息派番畀股東，尋日股價抽升15%至1.15元。派錢後，隆成手頭現金7.66億元，如果信管理層可以帶領公司成功轉形，發展醫療業務產品發展（去年仲蝕緊200萬），估值唔貴，亦至少可以視隆成為淨現金公司看待。

前日執筆寫新世界（00017）私有化新世界中國（00917），過唔到後者的股東特別大會，當時通告未出，只知四百幾位股東投反對票，搞到成單刁「窩河」。尋日睇番份通告，原來494個投反對票股東，揸得323萬股，佔投票股份僅僅0.16%，但竟然殺低咗揸20.49億股（投票股份99.84%），出席投票贊成的255個股東，真係大衞戰勝巨人哥利亞的翻版。

計落四百幾個人頭，平均每人持6,540股，以前日收市價6.38元計，即是區區四萬一蚊貨仔，居然搞瓜咗成個私有化計劃，呢個集體嫌錢醒的攪局行動，成為尋日飯局老友熱烈討論話題，但礙於怕惹官非，筆者唔打算同看官們分享。

新世界9元入得過

話時話，尋日新中股價最低見4.99元，跌穿私有化消息前起步位5.14元，比預期多，但以近一季內房股氣氛而言，亦唔算太離譜，最神奇仲係新世界跌住收市。史提芬講過，供股買新中計劃泡湯，新世界等於無端端有股東出資減債，美林計淨負債降至26%，仲未計賣掉CSL負債進一步回落，資產負債表靚咗，斷估資產淨值折讓有條件收窄，低過9元入貨，個人認為中線輸面極細。

上星期內地券商西南証券收購敦沛（00812），唔使等十月滬港通開通，內地券商看來已經急不及待要嚟香港爭定櫈仔。可惜今次同內地銀行嚟香港掃銀行牌唔同，本地證券行多，上市選擇亦都唔少，要一注押中獨贏難度極大。

近幾日史提芬左度右度，行內名聲好而又晒士唔細，好似新鴻基公司（00086），未必係併購者杯茶。至於市值比較細的，唔係業績麻麻，就係成交極奀，似乎只適合大大聲細細注，亂石投林打打水漂，但想搵真銀就唔太容易。