市場未見內地學生大規模搶租，但其實佢哋已經「做緊嘢」。有代理話，粉嶺公屋華明邨有低層三房戶，獲幾個即將嚟港嘅內地學生，透過師兄師姐用月租1.12萬元搶租，個單位月租一年升超過16%，月租隨時創新界北公屋新高。

本港近日錄得內地大學生搶租住宅單位個案。（資料圖片）

近期內地學生租樓情況

有地產代理同劉Sir傾開計，話其實班內地學生一早已經起動，只不過係自己同業主「刁」，仲未嚟香港已經租好樓。

好似華明邨有個低層單位，建築/實用面積約630/489方呎，間咗3間房，上年五月由投資者喺自由市場以約214萬元筍價買入，隨即以月租9,600元租俾內地學生，最近啱啱就嚟完約。

濱南實呎租$35成交

據了解，有幾個即將嚟港嘅內地學生收到師兄師姐通知，即刻加至月租1.12萬元搶租單位，仲一次過俾晒一年租，建築/實用呎租約17.8/22.9元，租金一年升成16.7%，業主揸貨一年租金回報升到超過6厘。

美聯劉偉健都話，暑假一向係學生搶租盤高峰期，紅磡海濱南岸3座低層H室，有3個內地學生用每月約2.1萬元租咗，建築/實用呎租約27.3/35.6元。

本港租務市場平穩，過往有唔少大財團買樓收租保值，到市好時可以套現。

盈利大廈33伙叫逾億

好似黃大仙盈利大廈有一籃子單位，透過卓先測量師行招標。該行潘子明話，今次有33伙招標，佔全幢大廈34%住宅比例，大部分係實用面積約307方呎細單位，總實用面積10,640方呎，依家全部有租約，估計新買家租金回報可逾3厘；該批單位下個月九號截標，意向價逾1億元。

市場有消息話，盈利大廈今次招標嘅一批單位，都由同一家內地保險集團揸貨。土地及公司註冊處資料，其中招標嘅7樓B室，由中國保險集團財務有限公司喺○九年以約96萬元購入。

有人估計今次好可能係業主見過市旺番，趁機套現，估計可以有價講。