魚缸Blogger：普天電纜異動可吼

成都普天電纜（01202）上周五出現異動，喺成交急增下，即市曾挾到去1.22元，創咗一年新高，埋單仍升7.5%，收報1.14元，拋離多條平均線1至1.02元的匯集區域，雖然牛叉擴闊兼短線黃金交叉利好，但考慮到呢隻股平時成交偏靜、波動又大，高追要留意流通量風險兼量力而為！

普天電纜主要產銷電線電纜、光纖光纜、線纜專用材料、輻照加工等各類資訊產業產品的器件，去年新增子公司普法公司，持有45%股權，另亦揸住60%成都中住、66.7%雙流熱縮、96.67%成都中菱。公司去年收入增長超過八成至9.1億元人仔，虧損縮至52萬元人仔，前年則蝕9,771萬元人仔。

此外，期內公司開展電氣裝備電纜業務，未來以進入鐵路幹線市場為大方向。今年國家電網目標固定資產投資上升20%至4,035億元人仔，○九年以來每年規模增幅只係1至4%，相信將可利好相關行業、紓緩產能過剩噩夢。