馬鞍山馬錦街限量地將會喺今個星期五截標，受到鄰區大埔白石角住宅地低價批出影響，有測量師已經調減咗地皮估值約10.8%，去到得番約6.6億元，係市場嘅下限價。不過，馬鞍山二手樓市近排勢頭真係幾勇，加上地皮位處市中心地段兼鄰近鐵路沿線，睇怕地皮嘅競投反應該唔會太差。

高緯環球張翹楚料馬錦街地競投反應不俗。（資料圖片）

馬鞍山馬錦街限量地資料

劉Sir知道，呢幅馬錦街限量地係今季賣地計劃嘅第二幅供應，地皮總樓面約20幾萬方呎，限建唔少於310伙。由於鄰區白石角科研路住宅地之前以每方呎樓面地價3,300元低價批出，所以有測量師已經調減馬錦街限量地估值超過一成。

樓面呎價料3300

老友高緯環球張翹楚話，馬錦街限量地景觀雖然無白石角地皮咁好，發展密度又高啲，但係位置上就有佢嘅優勢，喺正市中心地段又鄰近馬鐵馬鞍山站。

拉勻嚟計，樓面地價應該同白石角相若，每方呎大約3,300元左右，估值約6.6億元，比起最初估值調減咗約10.8%。

或吸引中小財團

雖然估值被調減，地皮又有限量條款。但劉Sir覺得發展商都仲有相當嘅投標意欲，理想城市張聖典都認同劉Sir嘅睇法。佢話早排減辣消息帶動換樓氣氛好咗，馬錦街限量地又切合用家需要，佢覺得可以吸引部分中小型財團入標，料競投反應唔錯。

事實上，近排馬鞍山二手市況係幾好。世紀21奇豐梁榮貴都話，今個月區內嘅私宅交投好旺，至今已經錄得超過60宗成交，其中龍頭屋苑新港城，就佔咗約14宗，平均建築/實用呎價大約8,200/10,900元。

梁榮貴話最近平價盤都被消化得七七八八，所以新港城兩房做價都上返去「四字頭」。好似G座高層3室，建築/實用面積495/363方呎，最近獲用家以405萬元買入，建築/實用呎價8,182/11,157元。