筆者前日決定追買國期，尋日開市價成本10,300點，在擴大定向降準的幫助下，收市帳面都只係得44點進帳。昨日A股失落MSCI，話就話唔少人心裏有數，得唔得五五波，不過昨日明顯見到淡友連趁消息反攻的興趣都欠奉，國期全日得54點波幅，個市有幾咁牛皮，唔使畫公仔畫出腸。

恒指期貨走勢

恒指昨跌58點，收報23,257點，主板成交525億元。恒指期貨日市收23,106點，較合理值高5點，國指跌10點，收報10,508點，滬綜指反而無受MSCI的消息影響，升2點，收報2,054點，維持作勢挑戰五月中至今的三頂格局。

工行（01398）將打頭陣除息，派末期息0.2617元人仔，恒指計落會因此少約74點。當然，高市值股除息唔係新鮮事，筆者只係想提醒恒指期貨及國期的「假低水」今日會相應收窄，玩家務必留意。

昨日恒指波指數再跌0.2至13.02，繼續改寫新低，牛皮膠着情況維持，隨着世界盃今晚開波，只怕六月中旬市況會更加買賣兩閒，缺乏方向。