Fundman睇市：瑞聲有力升多浸

查實尋日恒指跌幅，集中來自中移（00941）以及滙控（00005）兩隻重磅藍籌，恒指波幅指數就繼續沉淪，向16個月低位進發，整體大市根本就牛牛皮皮，未有方向。

大摩唔將A股放入MSCI，其實筆者並唔覺得意外。雖然論股市「晒士」，中國股市總市值3.28萬億美元，全球排名第五，在美國、日本、英國及香港之後，相當於環球股市總市值64.95萬億美元的5.06%，咪話無影響力。可是，數世界上有番咁上下規模的股市，而仍然嚴格限制外資參與的，亦只得中國。

A股入MSCI有排等

依家海外大孖沙要爭崩頭先可以經過QFII和RQFII配額制度，有限度咁投資A股，話說回頭，A股幾時可以入MSCI？筆者估計一年後都未必成事，至少等今年十月滬港通開通並運作一段日子，阿爺有信心放大配額畀更多海外資金參與，先至有得傾。

內地消息話，瀋陽市低調取消限購令，吊詭之處係尋日官方無即時就報道作出反應，無承認亦都無否認。

瀋陽限購之所以受關注，係因為這個位處東北地區的最大城市，亦是新建待售物業積存情況較嚴重的一二線城市之一，有證券行計過，五月底當地新建住宅庫存按年升28%，去到1,828萬平方米，估計至少需時廿二個月方可清除。

內房股隨時死貓彈

過去幾個月，先後有唔少三、四線城市傳靜靜雞取消限購令，假如短期內瀋陽真係獲中央首肯（或至低限度不被反對）取消限購，對於其他大量盤源積壓的城市，將起立竿見影之效果，而落後的內房股亦有機會來個死貓彈。

相信唔少果粉有留意到，幾乎隔日就見新一代iPhone6洩密圖片流出，似乎距正式面世日子不遠矣。全世界都知今次iPhone首次配大屏幕，之前被三星搶走的客仔好可能回到蘋果公司懷抱，人人預咗今次會賣個滿堂紅。

早排報道話德國有間電訊商為搶客，踢爆iPhone6將在九月中全球發行，真定假無人知，作為果粉，睇番自iPhone4s以來，全部iPhone都揀九月面世，傳聞算合理推測，而睇番過去幾代iPhone由公布到全球發售，差距介乎9至16日，大致可以估今次發布會最快會在八月下旬、最遲九月初舉行。

按過往經驗，蘋果公司及其他相關零部件股，往往都會炒到新產品正式發布前夕先行返轉頭，近期成交與股價級級上的瑞聲（02018），可能仲會升多一浸先至炒完。