備受期待的A股入MSCI食詐胡，兩地股市發軟蹄，滬綜指還能以微升2點收場，報2,054點，恒指則跌58點，收報23,257點。今晚世界盃開鑼，晚晚要捱通宵睇波，若然未來半個月見到魚缸早市淡靜，主要波幅都在午後始才出現，應該不感意外。

今年內地鐵路投資總額達八千億元人民幣，北車自然可分一杯羹。（資料圖片）

繼上周華彩控股（01371）藉內地一則有關大股東擬引入騰訊（00700）成公司股東的報道而炒上後，尋日又輪到星美文化（02366）因內地傳媒報道騰訊可能入股而急升逾五成，之後中途停牌澄清並無其事。先後兩單流料，日後見到類似的內地報道，缸邊友要提高警覺。但阿莊都係嗰句，呢個世界冇咁大隻蛤乸隨街跳，呢類大刁若然係堅，邊會有咁益人事先張揚等大家上車變相派錢？

憧憬中央打救車企

美國擬就中國光伏產品徵「雙反」稅，中國亦不甘示弱，商務部日前宣布，正就國內汽車市場潛在反競爭行為進行評估。事緣近年汽車業保持增長，但本土品牌汽車銷售增長卻落後於整體市場。近次定向降準措施範圍涉及汽車金融公司，但若然依照目前的競爭形勢，恐怕本土車企受惠有限，政策效應亦要打折扣，故不排除商務部會出招助本土車企一把。尋日比亞迪股份（01211）及長汽（02333）股價均升2%收市。

好耐冇睇過半新股，尋日見隻中國北車（06199）發力，高位見過5.3元，收報5.25元，升1.3%，成交4.5億元，創上市以來即市及收市新高。事緣北車披露，近日簽訂總值約216.71億元人仔的重大合同，大部分是內地項目，海外項目包括菲律賓馬尼拉輕軌列車合同，而該等重大合同佔去年去年營業收入約22%。

去年，北車的毛利率與南車相若，約17.2%，按年升2.9個百分點（南車則倒退0.5個百分點）。今年，內地鐵路投資總額預計達到8,000億人仔以上，北車自然可以分一杯羹，但長遠而言，為免惡性競爭，決勝將在於開拓海外市場的進度上，惟呢方面兩者仍須努力。

現時南車A/H價比率為87%，而北車A/H價比率則為103%，基本上，兩者經營差不多的業務，亦擁有差不多的市佔率，估值差別亦不應太大，A/H價比率會否趨於接近，不妨拭目以待。以北車股價走勢而論，尋日乃上市首天以來最大單日成交額，且乃連續兩個交易日企在招股價（5.17元）樓上收市，上邊冇蟹貨包袱，聚到人氣應該唔難短炒一轉。