世界盃揭幕戰仲有幾日至開打，但個市已經靜到烏蠅飛過都聽到，昨日恒指全日波幅得106點，即月期指好啲啲，上晝完成全日134點波幅，國期先恐怖，午市35點上落。

恆指期貨走勢 2014/6/9

多得上星期美股兩大指數創新高，以及中國五月出口數據反彈，昨日港股開高135點，之後全日窄幅上落，收市升166點，報收23,117點，處十六個月低位的恒指波幅指數，再跌0.16收13.57，即月期指日市收23,008點，較合理值高45點，成交得3.5萬張。

而吸引筆者留意的是昨日的大市沽空比率回落至9.5%，為七個交易日以來首次回到單位數，是否意味更多大戶投身唱好陣營？值得深究。

近期指數貼住高位發展，可是支撐大市升勢的都係落後的舊經濟股，標誌新經濟的濠賭股則一仆一碌，保守的入市取向，話基金經理睇好後市所以頂住指數作勢挑戰23,224點阻力，睇落唔似。

如果無idea，執平貨繼續是短期大勢，筆者情願試買國期好倉，可更集中押注內銀、內險，又唔使兼顧濠賭及騰訊（00700）等高beta股的波幅。事實上，五月中開始國指沿着10日線向上，升得慢，但主觀感覺升得相對穩定。