滬綜指力守兩千點關，港股亦唔多跌得落，全日波幅唔夠130點，主板成交僅486億元，買賣兩閒。不過，魚缸不乏花邊新聞，好似尋日早市傳來恒大同阿里有合作，刺激恒大地產（03333）股價做好，其後雖然只係恒大集團夥拍阿里搞足球，與恒大地產無關，但其股價埋單仍升逾2%，收報3.7元。

隨着內地人口老化，對心腦血管藥需求增長，利好四環業務。（資料圖片）

四叔話買地產股好過買樓，地產股普遍做好，其中信置（00083）股價升逾4%，恒地（00012）亦升3%，反而呢浪最先起步的長實（00001）則現回吐，微跌0.9%收場。

物流股整固再發力

上周券商排隊唱好的物流股，整固過後又再發力，深圳國際（00152）、海爾電器（01169）、華南城（01668）同升逾2%，中外運（00598）升7.8%。想追落後可選海爾，但論走勢則可留意華南城，目標重上4.2至4.3元水平，主要支持在3.5至3.6元區域。

此外，敦沛金融（00812）尋日有異動，一度踢到上0.55元，中途停牌前報0.485元，升幅59%。阿莊早前亦有提及，滬港通在十月通車，唔少內地投資者積極在港尋求券商等金融牌照，類似敦沛呢類規模較細的上市金融公司，頗大機會成為收購對象，係咪有好消息，等公司通告便自有分曉。

醫藥股抖咗一排又靜極思動，其中四環醫藥（00460）過去兩個月股價調整後正謀反撲，尋日為該股一送一紅股除權日，股價逆市升4.8%，收報4.82元。紅股料於本月廿三日開始買賣，不排除紅股出街前股價仲有得炒。

隨着人口老化，以及城市人口增加，飲食習慣改變，內地心腦血管藥需求甚殷，四環主營業務開正呢瓣，去年在內地心腦血管處方藥市場份額上升至9.3%，生意額按年增55%至47.32億元人仔，整體毛利率按年增3個百分點至78.2%，純利增44%至13.1億元人仔。市場預期，今年公司盈利可突破15億元人仔，有投行估計其今年純利可達17億元人仔，即係現價預測市盈率約23倍。

睇番股價，四、五月調整期間，經歷了基金沽貨套現及大股東入場增持，股價守穩4元關樓上。做定兩手準備，若然是浪能以大成交突破5.1元阻力，追入目標直指5.5元；若未能突破，則可待試4.4至4.5元水平再作考慮。