近排個人遊旅客減少，行過銅鑼灣同尖沙咀等核心購物區都會發覺少咗人，若果政府再削減內地人嚟香港嘅配額，一線舖租金定必成為重災區，其中銅鑼灣區唔少舖位租金已見頂回落，其中波斯富街1個單號地舖連閣樓，新成交租金跌咗27%；部分代理已經話今年一線區舖租一定跌，預計跌幅會由月初估計嘅5至8%，擴大到10至15%。

銅鑼灣區以波斯富街較多吉舖，個別業主惟有減租。

美聯工商舖黃漢成（右二）估計，一線區舖租跌幅擴大。

旅客心聲
港不吸引
居於深圳的羅小姐指收緊內地人來港對她無影響，因中港購物水平相若，來港購物吸引力不大。

影響工作
從事金融投資的賴先生每周至少來港一次，若限制內地人來港，對其工作會有很大影響。

今年銅鑼灣區部分商舖租務成交個案

睇返土地註冊處同市場資訊，今年頭五個月銅鑼灣區舖位有超過150宗租務成交。

不過，幾年前出現同一個舖位租金升幾倍嘅場面，似乎難以出現，五個月以嚟都只有不足5宗租金升五成或一倍嘅個案，升幅都係因為之前基數低，反而減租成交個案就愈嚟愈多。

好似波斯富街單號一個地下連閣樓舖位，啱啱新近租咗俾時裝公司，月租35萬，同舊有租金48萬元比較，仲平咗約莫13萬，跌幅27%。

另外，本地時裝品牌就用月租約4萬5千蚊租用渣甸坊雙號地下地舖，租金較之前少約10%。

業主忍手 叫租回落

部分業主見「勢色唔對」，唔敢獅子開大口，續租租金不變，部分就輕微加咗3.4至37%不等。區內依家有約莫10個舖位租金叫價減咗落嚟，跌幅由約3.5至逾15%不等，個別舖位更丟空超過一年。

759阿信屋之前就試下喺羅素街隔離嘅勿地臣街開舖，母公司CEC國際主席林偉駿同劉Sir講，個人遊旅客俾到嘅生意額只係約莫10至20%，而銅鑼灣舖租咁貴，佢哋覺得難以應付，加上睇唔好下半年嘅零售市道，所以暫時都唔會諗喺呢區擴充。

各行業租金負擔勢升

美聯旺舖董事盧展豪就話，旺角西洋菜街都開始有零星減租成交個案，若果內地個人遊旅客配額再減，睇怕珠寶鐘錶業嘅租金負擔比例，會由一二至一三年嘅3.7%，升到9.6%，高檔名牌產品就升10個百分點去到29.8%，而化妝護理業亦升5個百分點至17%，零售商利潤減少咗，將難再會花錢喺一線街搶舖。

美聯工商舖（00459）行政總裁黃漢成補充，佢哋五月初預計只係跌5至8%。不過若果縮減內地遊客配額，睇怕跌幅會加大到10至15%，估計今年一線區舖嘅租金會係○三年後首次出現下跌。