中國官方五月份製造業PMI數據好，但滙豐編制的PMI卻差過預期，由於兩者調查對象分別是國企及中小型民企，兩個數據繼續反映內地「官強民弱」的現實。

受政策因素及同業競爭影響，中移未來幾年盈利能力難望好轉。（資料圖片）

太陽日誌

中國要保住全年GDP增長不太偏離7.5%目標，樓市又初現庫存積壓，發展商為求清貨，令樓價出現岌岌可危的迹象，促使國務院終拋出「定向降準」措施。

老實講，今次出招比筆者估計的六月中下旬來得更早，掉轉頭睇，中央唔等第二季GDP就率先話有空間減RRR，實行出口術托住先，內地的情況可能比想像中嚴峻。美銀美林的中國策略師認為，定向降準會將內地第二至第四季的按季GDP推高1.8%左右，但預料全年仲係達唔到7.5%的目標，最終會係7.2%左右。

放水憧憬利內銀

放水憧憬刺激下，恒指尋日升209點，收報23,291點，升穿滬港通後一瞬即逝的23,224點高位，但成交唔算旺，主板得673億，比上周五的754億少一成。香港魚缸唔算得十分興奮，A股更闊佬懶理，滬綜指微跌收場，報2,038點，始終受制於50日線2,051點樓下，走勢麻麻。

受惠定向降準，內銀股表現最強，「工農中建」升幅介乎0.8至3.7%，而升得最多的農行（01288），獲瑞銀調高目標價，由3.1升至3.6元，令走勢火上加油。

澳門五月博彩收入323.5億澳門元，按年升9.3%，差過大行估計的14.5%升幅。無獨有偶，港府公布的四月零售業總銷貨價值，臨時估算為388億元，按年大跌9.8%，遠差過預期的跌4.4%。

澳門博彩收入增長放緩，肯定是受內地賭客荷包由鬆轉緊的影響，內地反貪腐對賭業的影響繼續浮面。至於四月香港零售數據之差，也是歸咎於珠寶首飾、鐘錶及名貴禮物銷售量急跌近四成所拖累。

零售商日子難捱

內地旅客經歷長期高速增長，今年五一假期也初見放緩。市民埋怨旅客太多，造成生活不便，遲遲未見政府反應，有趣係到今日訪港旅客人數及消費都呈高峰回落之際，特區政府先提出削減兩成內地遊客的研究，係咪後知後覺？大家自己判斷。零售店舖租期普遍兩至三年，租金回落速度往往滯後，這段時間，零售商戶日子恐怕相當難捱。

尋日三隻內地電訊股股價都見做好，但瑞銀就出嚟潑冷水，話稅制「營改增」仍然構成不明朗因素，至於合組基站公司則會令一哥中移（00941）喪失競爭本錢，故建議沽中移，買聯通（00762），而中電信（00728）則為中性咁話。

睇番今年首季，中移淨利潤率收窄3.1個百分點，至16.3%，為吸引轉用4G令手機補貼增加、網絡結算費減少及4G折舊上升，坊間預咗佢淨利潤率跌咗之後，未來兩三年內都好難回升。筆者估計中移盈利會由一三年的1,216億元人民幣，收縮至未來三年的1,030億至1,100億元人民幣之間，視乎政府交出幾多「補貼措施」，而4厘息則無增長，可謂食之無味棄之可惜。