近期租務市場再度轉旺，好似仲未入伙嘅鰂魚涌新盤MOUNT PARKER RESIDENCES（下稱MPR），最近已錄到兩宗預租個案，有極低層戶以月租6.5萬元租出，實用呎租52.2元。灣仔滙星壹號最近呎租破頂，有高層單位呎租達70元，媲美豪宅價。

滙星壹號最近有高層單位以破頂價租出。（資料圖片）

MOUNT PARKER RESIDENCES未入伙已錄得兩宗預租個案。（資料圖片）

近期港島區部分租務成交

有代理同劉Sir講，就嚟入伙嘅MPR，最近已經連錄兩宗預租個案。其中一個極低層B室，實用面積約1,245方呎，原先以月租約7.5萬元放盤，終於減到6.5萬元租出，實用呎租約52.2元，用買入價計，回報率都有成2.8厘。

MPR另一個低層C室，實用面積約1,396方呎，減租1.75萬元後，以約6.75萬元租出，實用呎租約48.4元，回報率約2.8厘。市場依家約有10個租盤，月租叫價由約8萬元起。

MPR個租金可以話係市價，事關鄰近嘅逸樺園，上月錄到至少5宗租務成交，實用呎租由約39至49元。其中一個1座高層E室，實用面積約896方呎，以月租約4.4萬元租出，實用呎租約49.1元。

滙星壹號呎租破頂

港島樓一向好租，尤其係灣仔以至鄰近金鐘商業區一帶嘅住宅物業。聽中原李志豪講，灣仔區租務一向都幾穩定，好似滙星壹號最近呎租更加破頂，個屋苑五月份錄到三宗租務成交，其中有一個高層A室兩房單位，實用面積496方呎，租咗約3.5萬元，實用呎租約70.6元，媲美豪宅價。

星街5號筍價租出

不過，都唔係個個物業表現都咁理想，好似灣仔星街5號最近有單位以低市價租出。香港置業林傑榮話，上述物業啱啱租出嘅極高層單位，建築/實用面積約676/408方呎，放租接近一年，由於業主見現時呢個物業仲有幾個租盤放緊，所以最近知道有實在租客對個單位有興趣，願意快起租，所以狠劈到約2.3萬元租出。

對比同類單位市值月租約2.9至3萬元，低超過兩成，相比二○一○年購入價，上述租出嘅極高層單位，租金回報率唔夠兩厘，建築/實用呎租約34/56.4元。